Almatyda qazaqtyń asa kórnekti ádebıet ókilderi Beıimbet Maılın, Ilııas Jansúgirov jáne Sáken Seıfýllınniń 125 jyldyǵyna arnalǵan «Úsh báıterek» atty ádebı-sazdy kesh ótti. Alash arystarynyń armanyn aqıqatqa aınaldyrǵan aıtýly keshte jyrdan shashý shashylyp, ásem áýender kópshiliktiń kóńilin terbedi.
Qazaq rýhanııatynyń úsh báıteregine balanǵan alyptarymyzdyń esimi urpaq jadynda kún ótken saıyn bıikteı berýge tıis. Osy maqsatty murat tutqan áserli keshte Qurmanǵazy atyndaǵy Qazaq Ulttyq Konservatorııasy «Halyq áni» kafedrasynyń meńgerýshisi Amangeldi Kúzeýbaı bastaǵan dástúrli ánshiler óner kórsetti. Baraqpaı Beksultan M.Eginbaevtiń «Úsh arys» ánin shyrqasa, Jandos Syzdyqov S.Seıfýllınniń «Taý ishinde» ánimen kórermen kóńilinen shyqty. Bul keshte «Úsh báıterektiń» ánderimen qatar alash arystarynyń muralarynan da shyǵarmalar oryndaldy. Atap aıtqanda, Shákárim Qudaıberdiulynyń «Bul án burynǵy ánnen ózgerek», Ahmet Baıtursynulynyń «Aqqum», Maǵjan Jumabaıulynyń «Sen sulý» sııaqty tanymal ánderi áýeledi. Osy rette «Úsh báıterektiń» shyǵarmashylyq keshinde alash arystarynyń ánderi de shyrqalǵany óte quptarlyq sheshim bolǵanyn aıryqsha ataı ketken jón. Sebebi, alash arystaryn sol zamandaǵy ádebıetshilerden bólip qaraýǵa bolmaıdy.
Shyǵarmashylyq keshte T.Júrgenov atyndaǵy Qazaq Ulttyq О́ner Akademııasynyń shákirtteri Sáken, Ilııas, Beıimbet jyrlaryn teatrlandyrylǵan kórinistermen kómkere oqydy. Munda Aıarys Dáýqaraev, Aıdos Qyzdarbek, Shahmardan Almahantegi, Nursultan Najekenov, Narıman Eginbaev, Nurjigit Tańatar jáne t.b. tálimgerler óz ónerlerimen kózge tústi. Atalǵan oqý ordasynyń ustazy Elik Nursultan shákirtteriniń shyǵarmashylyq keshke úlken daıyndyqpen kelgenin jetkizdi. «Bolashaǵyn úlken sahnamen baılanystyratyn shákirtterimiz árdaıym izdeniste júredi. Ol búgingi keshte de baıqaldy. Ilııas Jansúgirovtiń «Tolǵaný», «Qulager», B.Maılınniń «Qazaqqa», «Kedeıge», S.Seıfýllınniń «Biz» sııaqty óleńderin sheber oryndady» dep atap ótti. Sondaı-aq bul keshte kópshilik nazaryna «Úsh báıterektiń» shyǵarmalar jınaǵy jáne de alash arystarynyń ómirinen syr shertetin estelikterdi qamtyǵan aýqymdy kórme usynyldy.
«Ádebıet álemi» jobasy aıasynda ótken shyǵarmashylyq keshti Almaty qalasy Qoǵamdyq damý basqarmasynyń tapsyrysy boıynsha «Máńgilik Qazaqstan» qoǵamdyq qory uıymdastyryp otyr.
–Qazir kóp adamdar 1937-1938 jylǵy repressııany kúni keshe ǵana, osydan myń jyl buryn, sonaý tas ǵasyrynda bolǵan oqıǵa sııaqty qabyldaıdy. Alaıda seksen-aq jyl buryn tógilgen qan áli kepken joq. Sol kezderdegi qyrǵyndy kórgen adamdardyń kózi áli tiri. Búgingi keshimizge sol qýǵyn-súrginge ushyraǵan qaıratkerlerdiń urpaqtary da qatysyp otyr. Olardyń esimderin urpaq sanasynda áldıleý bizdiń boryshymyz, –deıdi «Máńgilik Qazaqstan» qoǵamdyq qory tóraǵasynyń mindetin atqarýshy Beıbit Moldahmet.