Úkimetiniń baspasóz ortalyǵynda ótken baspasóz konferensııasynda QR Aýyl sharýashylyǵy mınıstri Saparhan Omarov nan baǵasynyń turaqtylyǵyn qamtamasyz etý boıynsha qabyldanyp jatqan sharalar týraly aıtyp berdi. Bul týraly primeminister.kz habarlady.
Aýyl sharýashylyǵy mınıstriniń aıtýynsha, jalpy respýblıka boıynsha dándi-daqyldardy jınaý alańy 15,2 mln ga quraıdy, onyń ishinde 15,1 mln ga jınaldy, bul 99,2% quraıdy. 19,1 mln tonna astyq bastyryldy. Ortasha ónimdilik 12,6 s/ga qurady.
«Qazirgi ýaqytta egin jınaý jumystary 99,2%-ǵa aıaqtalǵan. Qalǵan 0,8%-y ‒ jumysty aıaqtap jatqan usaq sharýashylyqtar. Jańa astyqtyń túsimi, kólemi, sapasy týraly suraqtar týyndaıdy. Bıyl býnkerlik salmaǵynda 19,1 mln tonna astyq alamyz dep boljap otyrmyz. Bizdiń aldyn-ala esepteýlerimizge sáıkes, byltyrdan qalǵan astyqty esepke almaǵanda, bizde 11,5-12 mln tonna bıdaı bolady, sondyqtan bólýge shamamen 14 mln tonna astyq baǵyttalady. Bul ishki suranysty 6 mln tonnaǵa qamtamasyz etýge jetkilikti», - dedi S. Omarov.
Sonymen qatar, mınıstr nan baǵasynyń azdap ósýi kútilip otyrǵanyn, degenmen Azyq-túlik kelisimshart korporasııasynda baǵanyń kúrt kóterilýine jol bermeý úshin astyq jetkilikti ekenin aıtty.
«Nan baǵasynyń kúrt kóterilýine jol bermeý úshin biz qazir turaqtandyrý qoryna astyq satyp alýmen aınalysyp jatyrmyz. Sonymen qatar, ár oblys ákimdigi astyq pen un satyp alyp jatyr. Jyl saıyn ishki naryqtaǵy baǵany turaqtandyrý úshin aqpannan shildege deıin Azyq-túlik kelisim shart korporasııasy 150-den 250 myń tonnaǵa deıin astyq satady. Bıyl nan baǵasynyń kúrt kóterilýine jol bermeý úshin biz ishki naryqqa 150 myń tonna astyq sattyq», - dedi S. Omarov.
Onyń aıtýynsha, nan baǵasynyń qalyptasýy tek bıdaıǵa ǵana baılanysty emes, basqa da qosymsha shyǵyndar bar. Bul energııany tutyný, jalaqy, janarmaı jáne t.b.
«Munyń bári naryqtaǵy jaǵdaıǵa baılanysty. Búgingi tańda elevatorlarǵa barlyǵy 2,9 mln tonna astyq jetkizildi. Qarasha aıynyń sońyna qaraı barlyq astyq elevatorlarda bolady, sodan keıin biz baǵanyń qandaı bolatyndyǵyn túsinemiz. Nannyń baǵasy tek bıdaıǵa ǵana baılanysty emes, nan baǵasynyń qalyptasýynda bıdaı shamamen 54% quraıdy. Qalǵany basqa qosymsha shyǵyndarǵa baılanysty. Nan baǵasynyń kúrt kóterilmeýi úshin biz jumys isteımiz. Qazir nannyń baǵasy óńirge baılanysty 75-78 teńge aralyǵynda. Meniń oıymsha, shamaly ósim bolady», — dep naqtylady S. Omarov.
О́z kezeginde QR aýyl sharýashylyǵy vıse-mınıstri Rústem Qurmanov búgingi tańda Azyq-túlik kelisimshart korporasııasynyń turaqtandyrý qorynda 350 myń tonna astyq bar ekenin, oǵan qosa kelisimshart jasalǵan 70 myń tonna astyq bar ekenin aıtty, bul shamamen 400-420 myń tonna astyq. Bul kólem ishki naryqtaǵy baǵany turaqtandyrý úshin jetkilikti.
«Nan zaýyttary nannyń ár túrin shyǵarady. Bizdiń qyzmet salamyz áleýmettik nanǵa qatysty. Ákimdikterde quraldar bar ‒ bul turaqtandyrý qorlary, olar solardan un satyp alyp, áleýmettik nan pisirý úshin naýbaıhanalarǵa jetkize alady. Sonymen qatar, ákimdikter eki baǵytta áreket etedi: bireýi un satyp alady, saqtaıdy jáne naýbaıhanalarǵa jiberedi, al bireýi, kerisinshe, áleýmettik nanǵa arzan nesıe beredi», - dedi R. Qurmanov.
«Azyq-túlik kelisimshart korporasııasy» AQ basqarýshy dırektory Nurbek Daırbekovtyń aıtýynsha, qazirgi ýaqytta jalpy saqtaý syıymdylyǵy shamamen 12,2 mln tonna bolatyn 187 lısenzııa berilgen nan qabyldaý kásiporny bar, olar ákimdikter bergen lısenzııa negizinde qoıma qyzmeti boıynsha qyzmetter kórsetedi.
Sonymen qatar, AShTО́ 14,9 mln tonna astyq saqtaý múmkindigi bar. Osylaısha, astyq saqtaý qoımalarynyń jalpy kólemi 27,1 mln tonnany quraıdy, bul boljamdy ónimdilikti eskere otyryp, astyqty saqtaýǵa jetkilikti.
«Búginde Azyq-túlik kelisimshart korporasııasy respýblıka boıynsha nan baǵasyna monıtorıng júrgizýde. Biz qandaı sapadaǵy bıdaı jınalǵanyn, qansha kólemde jınalǵanyn qaraımyz. Osy sandarǵa súıene otyryp, biz ózimizdiń is-qımyldarymyzdy jasaımyz. Egin jınaý nátıjelerine qaraı biz tolyq baǵa berip, azyq-túlik korporasııasynyń turaqtandyrý qorlaryn qalyptastyrý maqsatynda naryqqa jańa usynystar engizemiz, osylaısha 2020 jyly kúzgi-kóktemgi kezeńde baǵany tómendetýge qajettilik týyndaǵan jaǵdaıda, ishki naryqtaǵy baǵany turaqtandyrýǵa quraldar bolady», - dedi N. Daırbekov.
Sonymen birge, búginde bıdaıdyń eksporttyq áleýeti shamamen 6 mln tonnany, arpa boıynsha ‒ 2 mln tonnaǵa jýyq jáne basqa dándi daqyldar boıynsha shamamen 300 myń tonnany quraıdy. Osylaısha, 2019 jylǵy eginnen barlyǵy 8,3‒8,5 mln tonna astyq eksporttalady dep kútilýde.