Qazir elimizdiń barlyq aýmaǵynda Ekologııa, geologııa jáne tabıǵı resýrstar mınıstrliginiń bastamasymen «eko-saǵat» aksııasy ótip, jappaı aǵash otyrǵyzý júrgizilip jatyr.
Osy sharaǵa jýyrda Petropavldaǵy resmı túrde «Abylaıhan rezıdensııasy», al halyq arasynda «Abylaıdyń aq úıi» atalatyn mýzeı-kesheniniń qyzmetkerleri de ún qosyp, aýlalaryna otyz túp shyrsha otyrǵyzdy.
Sol shyrshanyń birin «abylaılyqtar» elimizdiń ata gazeti «Egemenniń» júz jyldyǵyna arnapty. Onyń túbindegi taqtaıshada bylaı dep jazylǵan: «Bul shyrsha elimizdiń bas gazeti «Egemen Qazaqstannyń 100 jyldyq mereıtoıyna arnap otyrǵyzyldy».
Mýzeı dırektory Aıan Nábıulynyń aıtýyna qaraǵanda «Abylaı han mýzeıiniń ashylýyna «Egemenniń» tıgizgen paıdasy zor eken. «Osy ǵımarattyń Abylaıdyń úıi ekenin dáleldegen Máskeýden kelgen qujatty eń birinshi bolyp 2002 jylǵy 22 qarashada «Egemen Qazaqstan» gazeti birinshi betine «Abylaıdyń aq úıi – Ańyz emes aqıqat!» degen taqyryppen jarııalaǵan edi. Sodan keıin úıdi qalpyna keltirý jumystary qaýyrt qolǵa alyndy. Aqyry ol Elbasy N.Nazarbaevtyń qatysýymen 2008 jyly ashyldy. Qazir otyzǵa jýyq adam nápaqasyn aıyryp, jylyna birneshe myń adamǵa rýhanı azyq syılap, Qyzyljardaǵy eń basty mádenı oryndardyń biri bolyp otyrǵan mýzeıdiń ashylýyna «Egemen» sóıtip úlken paıdasyn tıgizgen. Sondyqtan biz ata gazetke rızamyz. Onyń ujymyn 100 jyldyq mereıtoıymen quttyqtaımyz. Myna shyrshany bizdiń syılyǵymyz dep qabyl alyńyzdar demekpiz», dedi ol.
Aıta ketetin jaıt, Qyzyljarda «Egemen Qazaqstannyń» atynda bir kóshe de bar. Osynyń ózinen eldiń teristiginde ata gazetke degen qurmet joǵary ekeni kórinse kerek. Endi, Abylaı han mýzeıiniń túbindegi «Egemenniń» shyrshasy da sony aıǵaqtap, jyldan jylǵa sharyqtap, óse berýin tileımiz.
PETROPAVL