Siz eGov mobile qosymshasyn paıdalanyp úlgerdińiz be? Memlekettik qyzmetterdi alýǵa múmkindik beretin jańa qosymshanyń birqatar ereksheligi bar. Barlyǵyn ret-retimen túsindirip óteıik.
Qosymshanyń jańa ataýy – eGov mobile.
AppStore ne PlayMarket-ten qosymshany izdegen shaqta sizge burynǵy mGov nusqasy shyǵýy múmkin. Bul úshin nitec.kz óndirýshisin taýyp, usynylǵan qosymshalardyń ishinen eGov mobile-dy tańdaısyz.
Qosymshaǵa kirý: Qosymshany júktegennen keıin siz óz sıfrlyq qoltańbańyzdy 4 tańbaly PIN-kodqa nemese bıometrııa qurylǵylaryna (smartfondaǵy Face ID, Touch ID múmkindikteri) tirkep qoıa alasyz. Keıin júıege kirgen kezde sizden ESQ ne qupııasóz talap etilmeıtin bolady.
eGov mobile-dy paıdalaný: Qosymshanyń ózinde ESQ-ny qalaı júkteýge bolatyny, avtorızasııadan ótý týraly jáne t.b. keńester bar, ár jańa qyzmetke qadamdyq nusqaýlyq berilgen. Osylaısha ázirleýshiler, ıaǵnı «Ulttyq aqparattyq tehnologııalar» AQ qosymshany qoldanysta barynsha qolaıly etýge tyrysty.
Usynylatyn qyzmetter: Qazirgi ýaqytta qosymshada 28 qyzmet qoljetimdi. Olar: bazalyq zeınetaqy tólemin esepteý mólsheri týraly anyqtama, bala týýyna baılanysty tólemder jáne bir jasqa tolǵanǵa deıin tólenetin járdemaqy, sottylyqtyń bolýy nemese bolmaýy týraly anyqtama, jyljymaıtyn múliktiń joǵy (bary) týraly anyqtama jáne t.b. Qyzmetter tizimi tolyqtyrylatyn bolady.