Álemdik tennıstiń maıtalmandary ıspanııalyq Rafael Nadal men serbııalyq Novak Djokovıch Nur-Sultanda bas qosyp, qaıyrymdylyq matchyn ótkizdi. Eki tennısshiniń arasyndaǵy 55-shi kezdesýde ıspanııalyq tennısshi jeńiske jetti.
Aty ańyzǵa aınalǵan tennısshiler TMD elderi arasynda tuńǵysh ret Qazaqstanda match ótkizdi. Rafael Nadal qazaq jerine osymen ekinshi ret kelse, Djokovıch elimizge alǵash ret taban tiredi. Ispan tennısshisi qazaq topyraǵyn eń alǵash 2014 jyly basqan bolatyn. Sol jyly ol elordada ótken qaıyrymdylyq týrnırine qatysyp, fransııalyq Jo-Vılfrıd Tsongamen sheberlik baıqasqan edi. Erler arasyndaǵy álemdik reıtıngtiń kóshin bastap turǵan eki juldyz Qazaqstanǵa kelgen sapary barysynda birqatar mańyzdy is-sharaǵa qatysty.
Eń aldymen eki tennısshi qazaqstandyq BAQ ókilderine arnalǵan arnaıy baspasóz máslıhatyna qatysty. Jıynǵa qatysqan Qazaqstan tennıs federasııasynyń prezıdenti Bolat О́temuratov eki tennısshi arasyndaǵy kezdesýdi osydan biraz jyl buryn josparlaǵanyn aıtty.
–Bul matchty uıymdastyrýdy eki jyl buryn oılastyrǵan edik. Biraq tennısshilerdiń ýaqytynyń tyǵyzdyǵyna ári jaraqattaryna baılanysty keıinge qaldyrýǵa týra keldi. Bizdi qyzyq ári tartysty match kútip tur. Bul kún tennıs áýesqoılary úshin ǵana emes, búkil qazaqstandyqtar úshin naǵyz mereke bolmaq, – dedi Qazaqstan tennıs federasııasynyń prezıdenti.
Qazaqstanǵa kelgenge deıin de únemi qaıyrymdylyq sharalaryna qatysyp, ózi de muqtaj jandarǵa kómektesip júretin Rafael Nadal mundaı usynysqa birden keliskenin jetkizdi.
–Maǵan sizderdiń elderińizden qaıyrymdylyq matchyn ótkizýge usynys túskende oılanbastan birden kelisimimdi berdim. Biraz jyldan beri qazaqstandyq tennısshilerdiń aıaq alysyn baqylap kelemin. Sizderdiń elderińizde tennıs sporty óte qarqyndy damyp keledi. Oǵan Mıhaıl Kýkýshkınniń, Andreı Golýbevtiń halyqaralyq arenadaǵy jetistigi dálel bola alady. Qazaqstan tennısin órge súırep júrgen Bolat О́temuratov myrzaǵa sulýlyǵyna kóz toımaıtyn Nur-Sultan qalasyna shaqyrǵanyna erekshe alǵys aıtamyn. Match týraly aıtar bolsaq, qaıyrymdylyq týrnırine qatysý men úshin úlken baqyt. Qazirgi tańda jastardy qoldaý, olarǵa baǵyt-baǵdar berý óte qajet dúnıe, – deıdi R.Nadal.
О́z kezeginde serb halqynyń ókili Novak Djokovıch jıylǵan jurtpen qazaq tilinde «Sálem» jáne oryssha «Zdravstvýıte» dep amandasyp, kezdesý jaıly óz oıymen bólisti.
–Qazaqstanǵa, mynadaı sulý qalaǵa alǵash ret kelip otyrmyn. Bizdiń sport úshin Bolat О́temuratov sekildi kisilerdiń qoldaý kórsetkeni mańyzdy. Al Rafaelge menimen taǵy da kortqa shyǵatynyna alǵys aıtamyn, – dep sózin qysqa qaıyrdy.
Baspasóz jıynynan keıin Rafael Nadal men Novak Djokovıch elordamyzdaǵy «Áziret Sultan» meshitin, Táýelsizdik saraıyn, Haileybury Astana brıtanııalyq mektebin, Nazarbaev Ýnıversıtetti, Ulttyq tennıs ortalyǵyn, «Astana Opera» Memlekettik opera jáne balet teatry men «Báıterek» monýmentin tamashalap, Nur-Sultan qalasyndaǵy tennıs ortalyǵynyń saltanatty ashylýyna qatysty. Ortalyq ishinde 36 adamǵa arnalǵan qonaqúı, 2 jattyǵý zaly, 6 kıim aýystyratyn oryn jáne eń bastysy 14 kort (8-i jabyq, 5-eýi ashyq, 1-eýi jaǵajaılyq) bar.
Negizgi resmı is-sharadan keıin qos tennısshi 11 626 kórermenge arnalǵan «Barys Arena» muzaıdynynda jas sportshylarǵa arnaıy sheberlik sabaǵyn ótkizdi. Keıinnen dene qyzdyrý jattyǵýyn jasap, ekeýi ózderiniń mereıli 55-shi matchyna kirisip ketti.
Elorda tórindegi ótken álemniń eń myqty degen tennısshileriniń arasyndaǵy ǵalamat kezdesý á degennen-aq tartysty bastaldy. Bir qaraǵanda ekeýi qaıyrymdylyq týrnırinde emes, «Úlken dýlyǵa» nemese «Masters» týrnıriniń fınalynda bas júldeni sarapqa salyp jatqandaı áser qaldyrdy. Alǵashqy sette sportshylar 9 geım oınady. Birinshi geımde Rafael jeńiske jetse, ekinshi geımde Novak esepti teńestirip ketti. Degenmen match barysynda eptiligimen kózge túsken Nadal birinshi setti óz paıdasyna jazdy. Esep – 6:3.
Ekinshi sette de qos tennısshi 9 geım oınady. Biraq bul joly Djokovıchtiń mereıi ústem boldy. Qaıyrymdylyq týrnıri aıasyndaǵy match bolsa da eki tennısshi jeńilgisi kelmeıtinin birden ańǵartty. Ekinshi settiń besinshi geımnen keıin serb tennısshisi 3:2 esebimen alda turdy. Alǵashqy setke qaraǵanda Novak bul joly qatelikke boı aldyrmaı jınaqy oınap, qalǵan úsh geımde de basymdyq tanytty. Eki sette jeńimpaz anyqtalmaǵan soń, tennısshiler chempıondyq taı-breık oınady. Qosymsha sette Nadal qarsylasynan 11:9 esebimen basym túsip, qaıyrymdylyq týrnıriniń jeńimpazy atandy.
Osylaısha eki tennısshiniń arasyndaǵy 55-shi kezdesýde Rafael Nadaldyń mereıi ústem boldy. Buǵan deıingi 54 matchtyń 28-inde Novak Djokovıch jeńiske jetse, 26 kezdesý Rafael Nadaldyń basymdyǵymen aıaqtalǵan bolatyn.
Bir aıta keterligi, Rafael men Novak kortta tek tennıs oınap qana qoımaı, matchty tamashalaýǵa kelgen jankúıerlerdiń kóńil kúıin kóterý úshin, olarǵa naǵyz sporttyq merekeni sezindirý úshin shoý uıymdastyrdy. Ásirese serb tennısshisi set arasyndaǵy úziliste birneshe jankúıerdi kortqa shyǵaryp, álemde trendke aınalǵan bılerdi bıledi. Sondaı-aq «bolboıǵa» (tennısshige dop berip turýshy – red) dopty tańdaý múmkindigin berip, jeńiske jetken soń «bolboıdy» qushaqtap, jeńisin birge toılady.
«Barys Arenaǵa» jınalǵan kórermender qos juldyzdyń ónerine súısinip, sport merekesinen tamasha áser alǵany ras. Mundaı kezdesýler balalardyń tennıs sportyna degen súıispenshiligin arttyryp, jastardy salamatty ómir saltyn ustanýǵa úndeıdi.
Qaıyrymdylyq týrnırinen túsken qarjy balalarǵa arnalǵan ınklıýzıvti alańdar salýǵa jáne oblystardaǵy aýdan ortalyqtarynda tennıs sportyn damytýǵa jumsalady.