Ál-Farabı atyndaǵy Qazaq Ulttyq ýnıversıtetinde kórnekti memleket jáne qoǵam qaıratkeri, xalyq jazýshysy Ábish Kekilbaev atyndaǵy aýdıtorııa ashyldy. Asyl sózdiń qasıetin emgen óskeleń urpaqty Ábish álemine jeteleıtin dárishana zańǵar jazýshyny eń alǵash qanattandyrǵan Fılologııa fakýltetiniń qabyrǵasynan saltanat qurdy.
Dárishana tórinde dáýletııar daryn ıesiniń bekzat bolmysyn kóz aldyńa ákeletin aıshyqty portreti ilingen. San alýan taqyrypta, ár qıly janrda qalam terbegen jazýshynyń shyǵarmashylyq jolyn, ómir jyryn, kóńil syryn tanytatyn túrli estelikter men kitaptar Kekilbaevtyń ult rýhanııatyna qosqan teńdessiz úlesin tanytyp turǵandaı. Ýnıversıtet ustazdary munda ótetin kúndelikti dáristerde tálimgerlerdi sóz zergeriniń shyǵarmashylyǵymen etene tanystyrý josparlanǵanyn aıtady.
«Sýretker jazýshy Ábish Kekilbaev ýnıversıtet qabyrǵasynda júrgen kezdiń ózinde jazǵan alǵashqy shyǵarmalarymen-aq ádebı qaýym men oqyrman jurtshylyqtyń nazaryn ózine aýdara bilgen kesek tulǵa. Búgin qýanyshymyz erekshe. О́ıtkeni aýdıtorııaǵa kirip-shyqqan saıyn, onyń qasynan ótken saıyn bizdiń stýdentterimiz tebirenetin shyǵar dep oılaımyn. Ábishtiń shyǵarmalarynyń eń keremeti – Ábishtiń kez-kelgen sóılemi qaıtalanbaıtyn sóılem. Myń qalamger Ábishtiń bir sóılemin qaıtalaı almaıdy» - deıdi Ál-Farabı atyndaǵy QazUÝ professory Beısenǵalı Qabıuly.
Jazýshynyń jary Klara Jumabaeva men qanattas-qalamdasy Dýlat Isabekov lentasyn qıǵan aýdıtorııanyń saltanatty ashylý rásimi «Ábish Kekilbaev – zamananyń zańǵar tulǵasy» atty respýblıkalyq ǵylymı-praktıkalyq konferensııaǵa ulasty. Onda ǵalymdar men jazýshylar Kekilbaevtyń qalamgerlik, qaıratkerlik hám azamattyq tulǵasy týraly tebirene tolǵap, kózin kórgender jarqyn estelikterimen bólisti. Jazýshy Smaǵul Elýbaı, professor Janǵara Dádebaev, M.O. Áýezov atyndaǵy ádebıet jáne óner ınstıtýtynyń dırektory Kenjehan Matyjanov, fılologııa ǵylymdarynyń doktory Temirhan Tebegenov óz baıandamalaryna tanym-taǵylymy tereńde jatqan Ábish Shyǵarmashylyǵyn arqaý etti.
Jıyn sońynda jazýshynyń jary Klara Jumabaeva sóz alyp, qalamgerdiń stýdenttik jyldardaǵy belsendiligi men ósken ortasy jaıly, ana tárbıesiniń oń yqpaly týraly oılarymen bólisti.
–Jazýshynyń jary bolý qıyn. Biraq sony jeńý kerek. Otbasy berekeli bolmasa, azamat óspeıdi. Azamattyń oılaǵan oıy da júzege aspaıdy. Ábishtiń anasy 98 jasqa kelip qaıtys boldy. Sol kisiniń ósıetimen men 50 jyl Ábishpen birge júrdim. Barlyq sharýasyn istedim. Tólen men Dýlat meni «Klara báteńkesiniń baýyn baılap, kóıleginiń ilgegin salyp jumysqa jiberedi» dep ázildeıdi. Odan men jaman bolǵan joqpyn. Qasıetti shańyraqta jalaýyn kótergen búgingi shara Ábishtiń árýaǵyna ǵana emes, búkil qazaq ádebıetine jasalǵan qurmet dep esepteımin», - dedi Klara Jumabaeva.