Mańǵystaý oblysynyń densaýlyq saqtaý basqarmasy jáne oblystyq Arnaıy monıtorıngtik top músheleriniń qatysýymen Densaýlyq saqtaý mınıstriniń 2019 jylǵy 15 aqpandaǵy «Qazaqstan Respýblıkasynda náresteler men bala ólimin azaıtý jónindegi 2019 – 2021 jyldarǵa arnalǵan is-sharalar josparyn bekitý týraly» buıryǵynyń oryndalýyna taldaý júrgizildi.
Jumys barysynda oblystyń memlekettik aýrýhanalaryna, emhanalaryna jáne perzenthana ortalyqtaryna monıtorıng jumystary júrgizildi.
Monıtorıng barysynda aýrýhanalar men emhanalardyń medısınalyq jabdyqtarmen qamtamasyz etilýi, bolashaq analardyń skrınıngten ótkeni, qansha náreste týylǵandyǵy, olardyń ambýlatorııalyq tekseristen ótýi jáne bala ólimi derekterine monıtorıng kezinde asa mán berildi.
Taldaý nátıjesinde Mańǵystaý oblystyq aýrýhanasynda satyp alý sharty boıynsha 2019 jyldyń basynan beri medısınalyq jabdyqtar alynbaǵany, oblystyq perınataldyq ortalyǵynda jańa týylǵan nárestelerge arnalǵan tósektiń jetispeýi, Mańǵystaý aýdandyq perınataldyq ortalyǵynda medısınalyq jabdyqtardy qoldaný jáne saqtaýda sanıtarlyq normalary saqtalmaǵany jáne Mańǵystaý aýdandyq aýrýhanasynda órtelýge tıisti paıdalanylǵan preparattar qoqys jáshiginde jatqany anyqtaldy.
Júrgizilgen jumys nátıjesi boıynsha jumys tobymen taldaý anyqtamasy jasaqtalyp, monıtorıng júrgizilgen medısına mekemelerine anyqtalǵan kemshilikterdi joıý boıynsha usynystar engizildi.