Tarıhymyzda áıelderdi atqa qonýǵa májbúr etken zamandar ótken. Áıeldiń ıyǵyna salmaq túsirgen júk te zamanyna qaraı túrli bola ma deısiń. Aıdahardyń demindeı jahandaný jyljyǵan HHI ǵasyrda da qazaq áıeliniń kóterer mehnaty az bolmasa kerek.
Ult bolyp saqtalýymyzǵa, ıirimge túsip jutylyp ketpeýimizge kepil bolatyn ulttyq kodtyń tizgini ananyń qolynda tur, qýrap ketpeýi úshin ulttyq tamyrdy sýarý da ananyń qasıetti mindeti eken. Bul aıtýǵa ońaı nárse, al tarqatar bolsań atan kótermes aýyr júk. Qostanaıda Qazaqstan halqy assambleıasy respýblıkalyq analar keńesiniń keńeıtilgen otyrysyndaǵy talqylanǵan máselelerdiń de temirqazyǵy osy edi.
Prezıdent Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda jáne Elbasynyń «Rýhanı jańǵyrý» baǵdarlamasynda belgilengen mindetterdi sheshýdegi analar keńesteriniń róli» atty taqyryp aıasynda áńgime órbigen sharaǵa Qazaqstan Halqy assambleıasy tóraǵasynyń orynbasary – Qazaqstan Respýblıkasy Prezıdenti Ákimshiliginiń Hatshylyq meńgerýshisi Janseıit Túımebaev, oblys ákimi Arhımed Muhambetov qatysty. Jalpyulttyq jospardyń iske asyrylýyna jaýapty ortalyq memlekettik organdardyń qyzmetkerleri, sondaı-aq Nur-Sultan, Almaty, Shymkent qalalary men oblystar assambleıalary analar keńesteriniń, etnomádenı birlestikteriniń tóraǵalary men músheleri de shaqyryldy.
– Ana – qasıetti sóz. Otandy anaǵa teńeımiz, tildi de ana tili deımiz. Otbasynyń qazyǵy – analar. Otbasy berekeli bolsa, memlekettiń irgetasy myqty bolady. Balanyń tárbıesinde de ananyń mańyzy erekshe. Bala – bolashaq. Al bolashaqtyń qandaı bolary da anaǵa baılanysty eken. Ultty tárbıeleıtin de ana, – dedi Janseıit Túımebaev.
Ásirese áleýmettik máseleler ózektiligi júıkeni tozdyratyn búgingi qoǵamda áıelder belsendiligi qajettilikke aınalyp otyrǵany ras. Qoǵamda qandaı áleýmettik másele kóterilse de, bir ushy anaǵa kelip tireledi. Onyń ústine urpaqty da, ultty da tárbıeleıtin ananyń ózine qamqorlyq kerek. Statıstıka boıynsha áıelderdiń 70 paıyzy ómirinde bir ret bolsa da túrli, turmystyq zorlyq-zombylyqty bastan keshedi eken. Otbasynyń ajyrasýy da sońǵy jyldary óte jıiledi, jastar arasynda otbasylyq qundylyqtardyń kómeski tartýy baıqalady. Tastandy balanyń azaımaýy, balaǵa qarsy qylmystyń óris alýy qoǵamdaǵy asa aýyr kórinistiń biri. Janseıit Qanseıituly oblystarda osyǵan oraı jumys júrgizip otyrǵan analar keńesterin, sonyń ishinde Qostanaı oblysyndaǵy analar keńesiniń «Otbasyn qoldaýdyń resýrstyq ortalyǵy» jobasy jumysyn rızashylyqpen atady.
Qostanaı oblystyq Qazaqstan halqy assambleıasy júrgizip otyrǵan jumystardy oblys ákimi Arhımed Muhambetov te atap ótti. Ústimizdegi jyldyń 9 aıynda oblysta 127 iri shara ótkizilgen. Analar keńesi oblystaǵy qaıyrymdylyq isin damytýǵa úles qosyp otyr. Olardyń bastamasymen ótken «Ystyq nan», «Ashyq júrek», «Taza oıyn», «Býkkrosıng», «Merekelik tústik as» sııaqty qaıyrymdylyq aksııalary 4 myńǵa jýyq adamdy qamtyǵan.
– Oblysta Elbasynyń bastamasymen ómirge joldama alǵan «Baqytty otbasy» jobasy qarymdy júrip jatyr. Qostanaılyq kásipkerlerdiń qoldaýymen 48 kóp balaly ana baspanaly boldy, – dedi Arhımed Begejanuly.
Qoǵamdaǵy kóptegen ózekti máselelerdi analar bastamasymen qolǵa alǵan ister sheshedi. Arqalyq qalasyndaǵy analar keńesin ardager ustaz Baqytjamal Qalqaeva basqarady. Olar bes baǵytta jumys júrgizedi, sonyń ishinde jasóspirim qyzdar tárbıesimen aınalysatyn «Parasat» klýbynyń jumysyn erekshe ataýǵa bolady. Sonymen qatar analar forýmyna qatysýshylardyń da áńgimesinen kóptegen ıgi ister baıqalady. Aqmola oblysy analar keńesi tóraıymynyń orynbasary Záýre Qońqabaevanyń jeke avtorlyq baǵdarlamasy da nazarǵa alarlyq.
– Analar keńesinde túrli baǵytta jumystar júredi. Bári de jaqsy, jas qyzdar tárbıesine basa kóńil bólemiz. Degenmen, tek aıta berýmen de is ónbeıdi, úlgini ispen kórsetý kerek. Meniń jeke baǵdarlamam boıynsha, eki jyldan beri balalardy qazaq aýyldaryna aparyp, on kún boıy qazaq tilin úırenýge, qazaq halqynyń dástúrlerin kórýge, ulttyq taǵamdardyń jasalýymen tanysýǵa jaǵdaı jasaımyz. Maǵjan Jumabaevtyń, Ǵabıt Músirepovtiń aýylynda, elimizdiń ońtústik, batys oblystarynda boldyq. Jıyrma bes bala aýylǵa barǵanda qurt qaınatý, aıran ashytý, qoı qyrqý, sıyr saýý sııaqty jumystardyń barlyǵyn on kún boıy ózderi atqardy. Bul oqýshylar tobynda ul-qyzy, orys, qazaǵy, basqa ulttary da aralas boldy. Jasóspirim, bala kezindegi osy saıahat olardyń ǵumyr boıy esinen shyqpaıdy, olardyń boıynda ulttyq dástúrge, Otanǵa degen patrıottyq sezim, qurmet qalyptasady, – deıdi Záýre Balýanqyzy.
Eki kúnge sozylǵan analar forýmy baı baǵdarlamamen erekshelendi. Qatysýshylar qaıyrymdylyq aksııasyn, A.Baıtursynov atyndaǵy Qostanaı memlekettik jáne О́.Sultanǵazın atyndaǵy Qostanaı memlekettik pedagogıkalyq ýnıversıtetteriniń stýdentterimen kezdesýler ótkizip, qala kitaphanalaryna Assambleıa atynan kitaptar tabys etti. Sonymen qatar áıelder men balalardy ómirge beıimdeý jáne ómirde qıyndyqqa tap bolǵan balalardy qoldaý ortalyqtarynda boldy. Keshke I.Omarov atyndaǵy oblystyq qazaq drama teatrynda «Rýhanı jańǵyrý» baǵdarlamasy men Assambleıanyń «Qazaqtaný» jobasy aıasynda aýdarmashy, aqyn Kamal Álpeıisovanyń «Tórkindeý» atty shyǵarmashylyq keshi ótti. Forým qonaqtary qolóner sheberleri men analardyń óz qolymen jasaǵan buıymdarynyń kórmesin tamashalady.
QOSTANAI