Elordadaǵy Jastar teatrynda «Naz» memlekettik bı teatrynyń «Jıyrma jyldyq bı ǵumyr» atty mereıtoılyq konserti ótti.
Bı keshine jıylǵan jurtshylyqty Jastar teatrynyń foıesinde erekshe tartý-taralǵy kútip turdy. Áriptesterine syı jasap júrgen mańǵystaýlyq horeograf – Serik Sarıev. Bı ónerin qurmettep, dáripteıtin azamat qylqalam sheberlerine arnaıy tapsyrys jasap, bı óneri maıtalmandarynyń portretterin salǵyzypty. Maıly boıaýmen, asqan sheberlikpen salynǵan dúnıelerdiń árqaısysy da ózinshe syrly, qundy. «Jaqsyny kórmek úshin» degendeı bul portretterdiń «Danalar. Máshhúrler. Ulylar» ataýymen arnaıy kórmesi uıymdastyrylyp, ony Qazaq ulttyq horeografııa akademııasynyń professory, Qazaqstannyń eńbek sińirgen ártisi Toıǵan Izim men Qazaqstannyń eńbek sińirgen qaıratkeri, qoıýshy-baletmeıster Aıgúl Tátı ashty.
«Naz» – elimizdegi alǵashqy kásibı bı teatry. 1999 jyly Astana qalasy memlekettik fılarmonııasy janynan alǵash «Naz» halyq bı ansambli bolyp qurylǵan. 2007 jyly Astana qalasy ákimdiginiń «Naz» memlekettik bı teatry bolyp ataldy. Teatrdyń irgetasyn qalaǵan kásibı horeograftar Erkebulan jáne Hadısha Aǵymbaevtar. «Naz» qurylǵan kúnnen bastap Nur-Sultan qalasyndaǵy mádenı is-sharalarǵa belsene qatysyp, kópshiliktiń iltıpaty men qurmetine bólenip kele jatqan mańdaıaldy mádenı ujymdar qatarynda. Konserttiń ashylý barysynda quttyqtaý sóz sóılegen «Naz» memlekettik bı teatrynyń dırektory Sultan Sraıylov teatrdyń jıyrma jylda jetken jetistikteriniń qomaqty ekenin jetkizdi. Osy keshte Mádenıet jáne sport vıse-mınıstri Nurǵısa Dáýeshov teatr ártisi Azamat Bektemirovti «Qurmet» gramotasymen, Aqan Rysqalıev jáne Natalıa Leontevany «Mádenıet salasynyń úzdigi» tósbelgisimen marapattady.
Konserttik baǵdarlamada kórermender qazaqtyń ulttyq bıleri men álem halyqtarynyń bılerin tamashalap, horeografııalyq spektaklderden úzindiler kórdi. Myń buralǵan bıshiler qalamgerlerdiń saǵattap jazatyn sezim dúnıelerin sanaýly mınýttarǵa syıǵyzyp, kórermenderdi kórkemdik álemine qonaq etti. Onyń ishinde dara talant Nurǵısa Tilendıevke arnalǵan «Nurǵısa» bı-spektakli, álemdik tarıhta orny bar bahadúr qolbasshyǵa arnalǵan «Shyńǵys han» qoıylymy, shyǵys ertegileri negizinde sahnalanǵan «1001 tún», jasóspirimderge arnalǵan «Ý sana» horeografııalyq spektakli kórkemdik estetıkasy óte joǵary, teatrdyń qoltańbasy anyq baıqalatyn dara dúnıeler ekenin aıtý kerek.
Ártistiń sahnalyq kostıými onyń ónerine ár berip, shyǵarmashylyq tulǵasyn mańyzdy etip kórsetedi. Bul oraıda «Nazdyń» «Zeken moda» sán úıimen shyǵarmashylyq baılanysynyń jóni bólek. «Nazdyń» mereıtoıynda kórermender atalǵan sán úıiniń «Jastar jalyny» atty defılesin tamashalady.
«Naz» memlekettik bı teatry byltyr 20 jyldyq mereıtoılaryna arnap «Bı – sezimniń poezııasy» atty respýblıkalyq jyr músháırasyn jarııalaǵan eken. Konserttik keshte músháıranyń qorytyndysy da shyǵaryldy. Ulttyq bılerimizdiń mártebesin kóterý, bı óneriniń halyqtyń turmys-tirshiliginde alatyn ornyn anyqtaý maqsatynda jarııalanǵan músháıraǵa aqyndar kóptegen óleń jibergen. Sonyń ishinde eń úzdik óleńderdiń toptamasy Tolqyn Sultannyń «Naz memlekettik bı teatry. Jıyrma jyldyq beles» atty teatr tarıhynan syr shertetin kitabyna enipti. Kitap jaqyn kúnderi baspadan shyǵyp, oqyrmanǵa jol tartatyn bolady. Al músháıraǵa keletin bolsaq, júzden júırik shyqqan aqyndardyń esimderi kesh barysynda belgili bolyp, tıesili syılyqtary tabystaldy. Yntalandyrý syılyǵy jáne alǵys hatpen Serik Seıtman, Áskerhan Aqtaı, Qýat Ejembek, Narqulan Raıhan sekildi aqyndar marapattaldy. Júldeli III oryn, dıplom jáne 100 000 teńge aqshalaı syılyqqa aqyndar Juma-Nazar Somjúrek pen Qalqaman Sarın ıe boldy. II orynnyń 200 000 teńgesi men dıplomy aqyn Ashat Aımaǵanbetovty tapty. Al baıqaýdyń I ornyn jáne 300 000 teńge aqshalaı syılyq pen dıplomdy aqyn Azamat Máljanbaı aldy.
Aıgúl SEIIL,
«Egemen Qazaqstan»