Qurlyqtyq hokkeı lıgasynda (QHL) kúsh synasyp júrgen «Barys» qatarynan tórtinshi kezdesýde jeńilistiń kermek dámin tatty.
Bul joly jerlestermiz Nur-Sultanda Ekaterınbýrgtiń «Avtomobılıst» klýbyn qabylady. Kezdesýdiń 7-mınýtynda Djeff Platt qonaqtardy alǵa shyǵardy. 26-mınýtta Egor Shalapov esepti teńestirdi. 39-mınýtta Brýks Meısek mergendik tanytty.
Úshinshi kezeń bastalǵan bette «Barystyń» oıynshysy Arkadıı Shestakov esepti teńestirdi. 2:2 50-mınýtta «Avtomobılıst» qaıta alǵa shyqty. Bul goldyń avtory – Pavel Dasıýk. 55-mınýtta bizdiń komandanyń kapıtany Darren Dıs gol soqty. Osylaısha, qonaqtardyń úsh ret alǵa shyqqanyna qaramastan, jerlesterimiz qarymta qaıtardy.
Alaıda overtaımda Ekaterınbýrgten kelgen hokkeıshilerdiń baǵy jandy. Kezinde «Barystyń» sapynda oınaǵan Naıdjel Doýs jeńis golyn soqty. Nátıjesinde «Barys» óz aıdynynda 3:4 esebimen jeńilis tapty.
Qazirgi kezde «Barys» turaqty birinshiliktiń jarys kestesinde jetinshi oryndy qanaǵat tutýda. Osy kúnge deıin 23 kezdesý ótkizgen olardyń enshisinde 30 upaı bar. Kelesi oıynda jerlesterimiz erteń Nur-Sultanda Máskeýdiń SSKA klýbyna qarsy ótkizedi.