Elordada Aqparat jáne qoǵamdyq damý mınıstrliginiń qoldaýymen «Eńbekqor jastar» aqparattyq sharasy aıasynda «Jastar resýrstyq ortalyqtary eńbek naryǵynyń jańa bolmystarynda» atty respýblıkalyq semınar-trenıng ótti.
Semınar-trenıngtiń maqsaty – elimizdiń on bes aımaǵynan at basyn burǵan osy ortalyq jetekshileri men jas kóshbasshylaryna dýaldy bilim berý, daǵdarysty basqarý, jobalyq menedjment jáne basqa da baǵdarlamalar boıynsha baıypty baǵdar berý. Qala men aýyl jastarynyń eńbek naryǵyna etene aralasýyna uıytqy bolatyn osy ortalyq mamandary ekenin eskersek, bul semınar jumysynyń mańyzy zor.
– Jastar resýrstyq ortalyqtary – elimizdegi jastar saıasatyn damytýdyń negizgi tiregi. Búginde respýblıka aýmaǵynda osyndaı 208 ortalyq júıeli jumys istep keledi. Ortalyq mamandaryna eriktiler qyzmetin jolǵa qoıý, jastardy jumysqa ornalastyrý, aqyl-keńes berý, olardyń jańa mamandyqty ıgerýine járdemdesý syndy mańyzdy mindet júktelip otyr. Sondyqtan bul semınar eń aldymen ortalyq mamandarynyń biliktiligin arttyrýǵa, túıtkildi máselelerge qulaq túrip, sheshimin tabýǵa negizdelgen der edim. Osy kúni ortalyq mamandarynyń biliktiligin arttyrý jumystary tek Atyraý oblysynda ǵana júzege asýda, – dedi Aqparat jáne qoǵamdyq damý vıse-mınıstri Danııar Esın.
Elimizde jastardy jumyspen qamtý máselesine qatysty túrli baǵdarlamalar qolǵa alynǵan. Suranys az mamandyq ıelerin qaıta daıarlaý, olardyń suranys bar óńirlerge qonystanýyna qoldaý kórsetý jumystary da qolǵa alynǵan.
– «Eńbek» baǵdarlamasy jóninde estigen bolarsyzdar? Alaıda, estý men bul baǵdarlamanyń naqty jumys tetigin bilý – eki bólek dúnıe. О́kinishke qaraı, «Jumyspen qamtý» ortalyǵyna taban tiregen azamat baǵdarlamanyń bar múmkindigin paıdalana bilmeıdi. Aıyp jumys izdeýshide emes, memlekettik organdarda. Máselen, osy qyzmetke taǵaıyndalmas buryn bul baǵdarlama týraly estip-bilgen emespin. Tipti Qazaqstanda «Jumyspen qamtý» ortalyqtary bar ekeninen de beıhabar edim. Sondyqtan ár otandasymyzǵa tıimdi baǵdarlamalar men qoldaýlar baryn jetkizý asa mańyzdy, – dedi Eńbek jáne halyqty áleýmettik qorǵaý vıse-mınıstri Narıman Muqyshev.
О́z mamandyǵyn jan-tánimen súıip, ony ózgertkisi nemese ózge óńirge qonys aýdarǵysy kelmeıtin jumyssyz jastardy eńbekpen qalaı qamtýǵa bolady? Mundaı jastarǵa eń aldymen jeke kásipkerlikpen aınalysqan tıimdi der edik. Bul týraly «Atameken» ulttyq kásipkerler palatasynyń ókili Úmit Meńdalıeva:
– «Atameken» ulttyq kásipkerler palatasy birneshe jyl kóleminde kásipkerlik negizderin oqytyp keledi. Alǵashqy qadam 2017 jyly «Eńbek» baǵdarlamasy aıasynda jasalǵan edi. Sodan beri 88 myń otandasymyz bıznestiń qyr-syryn meńgerip úlgerse, bıyl Jastar jyly aıasynda 18500 jas azamat bilimin jetildirdi. Sonyń 5 myńnan astamy aımaqtarda jobalaryn sátimen júzege asyrýda. Bul rette, jobalardyń basym bóligi memlekettik grant negizinde iske asqanyn aıta ketý qajet. Jalpy, osy úsh jyl aralyǵynda 23 myń bıznes-joba qoldaý tapty, – dedi.
Semınar jumysy aıasynda ortalyq ókilderi ózderin tolǵandyrǵan saýaldaryn qoıyp, shara sońynda qatysýshylarǵa sertıfıkat tabystaldy.
Raýan QABIDOLDA