Aqtaýda Sybaılas jemqorlyqqa qarsy is-qımyl agenttigi Mańǵystaý oblysy boıynsha departamentiniń aldyn alý jáne parasattylyq basqarmasy bas mamanynyń qatysýymen «Mańǵystaýmunaıgaz» jaýapkershiligi shekteýli seriktestiginiń kyzmetkerlerimen kezdesý ótti. Bul týraly departamenttiń baspasóz qyzmeti habarlady.
Departamenttiń bas mamany Janna Shyrtanova óz baıandamasynda agenttik pen departament tarapynan sybaılas jemqorlyqty boldyrmaý jolynda «Mańǵystaý – adaldyq alańy» jobalyq keńsesi aıasynda Arnaıy monıtorıngtik toby múshelerimen júzege asyrylǵan jumystardyń nátıjesin ataı otyryp, sybaılas jemqorlyq faktileri boıynsha statıstıkalyq málimettermen tanystyrdy.
Sonymen qatar is-sharaǵa Aqtaý qalalyq Beket Ata meshitiniń naıb ımamy Izdibaı Qobylanov sybaılas jemqorlyq saldarynyń qoǵamǵa tıgizer zııany týraly aıtyp, onyń tek qana zaıyrly zańdar emes, sonymen birge qasıetti Quran aıattarymen de, Muhammed Paıǵambardyń súnnetimen de asa qatal túrde aıyptalatynyn jetkizdi.
Kezdesý nátıjesinde qatysýshylarǵa arnaıy daıyndalǵan beınerolıkter kórsetilip, sybaılas jemqorlyqqa qarsy mádenıetti qalyptastyrý qajettigi, bul zaman talaby ekendigi, aqparattyq jáne uıymdastyrýshylyq sıpattaǵy belsendi sharalar kesheni arqyly ǵana júzege asyrylatyny aıtyldy.