Reti jaǵynan №28 dep belgilengen bul bilim oshaǵy jáı mektep emes, mektep-gımnazııa boldy. Burynǵy kásiptik-tehnıkalyq kolledj ǵımaratyn orta bilim oshaǵyna laıyqtap jóndeý jumystary shilde aıynda bastalǵan bolatyn. Endi 900 oryndyq úsh qabatty nysan jańa toqsanda paıdalanýǵa berilip otyr.
Mekteptiń aǵymdaǵy jóndeýine 250 mıllıon teńge jumsalsa, onyń 95 mıllıony demeýshilerdiń qarjylandyrýymen júzege asyp otyr. Tóbesi jabylyp, ishi jańartyldy, kabınetter jańa jıhazdarmen jabdyqtaldy. Ásirese, hımııa, fızıka, bıologııa, robot tehnıkasy synyptaryna zamanaýı qural-jabdyqtar ornatyldy. 160 oryndyq ashana, mýzyka, horegrafııa, sport, akt zaldary, dálizder qolaılylyǵymen zamanaýı talaptarǵa jaýap beredi.
«Prezıdent Qasym-Jomart Toqaev Qazaqstan halqyna Joldaýynda «qazaq tiliniń memlekettik til retindegi róli kúsheıip, ultaralyq qatynas tiline aınalatyn kezeńi keledi» dep aıtqan edi. Qazir oblys ortalyǵynda memlekettik tilde bilim beretin 6 mektep jumys isteıdi. Alaıda solardyń ózi jas urpaqqa ana tilinde bilim berýge tarlyq etkeni baıqalyp júrgen edi. Qysqa merzim aralyǵynda úlken jumys atqaryldy. Mekteptiń ashylýy memlekettik tildiń mártebesin arttyrý jáne jalpy bilim berýdi damytý salasynda jasalǵan mańyzdy qadam bolyp tabylady. Munymen jumys toqtap qalmaıdy, áli de aýlany abattandyrý, kólik turaǵyn ashý sııaqty jumystar bar», dedi quttyqtaý sózinde Qostanaı qalasynyń ákimi Qaırat Ahmetov.
Qala basshysy qarasha aıynyń aıaǵyna qaraı gımnazııanyń birinshi qabatynda búldirshinder úshin 90 oryndyq shaǵyn ortalyq ashylatynyn habarlady.
Qostanaı qalasynyń qurmetti azamaty, aqyn Aqylbek Shaıahmet sózin Uly aǵartýshy Ybyraı Altynsarınniń «Kel balalar, oqylyq, Bir Allaǵa syıynyp» óleńimen bastady.
«Osydan 42 jyl buryn men áskerı qalashyq shaǵyn aýdanynda turǵanda ózimniń balalarymdy jalǵyz qazaq mektebine bergen edim. Ol kezde Y.Altynsarın atyndaǵy mektep-ınternat bolatyn. Allaǵa shúkir, nemerelerim de qazaq mektepterinde oqyp júr. Táýelsiz el boldyq. Bizdiń memleketimizdiń bolashaǵy – qazaq tilinde» dep, Aqylbek aǵamyz qýanyshymen bólisti.
Saltanatty sharada ata-ana Qydyrbek Qıysqan mektepke ǵalym-ustaz, qoǵam qaıratkeri, (lıngvıst jáne matematık), pýblısıst ári aýdarmashy, "Qazaqtyń Lomonosovy" atanǵan, ótken ǵasyr basynda Qostanaı ýezi boıynsha «Alash Ordanyń» komıssary jáne Qostanaıdaǵy bólimshesiniń tóraǵasy qyzmetin atqarǵan Eldes Omarulynyń esimin berý jóninde usynys bildirdi.
Jańa bilim ordasynda ázirge 500-ge tarta shákirt bilim alýda. Olardyń basym bóligi Qostanaıdaǵy B.Momyshuly atyndaǵy №5 aralas mektepten aýysyp keldi. Munda dástúrli bilim berýmen qatar "Jas sarbaz" synyptary da bar.