2019 jyly Úılestirý agenttigi Mańǵystaý, Aqmola, Atyraý, Batys Qazaqstan oblystary men Nur-Sultan, Almaty qalalarynda Dúnıejúzilik bank pen Qazaqstan Respýblıkasy Bilim jáne ǵylym mınıstrliginiń qoldaýymen Jastar korpýsyn damytý jobasyn iske asyrdy. Bul týraly Úılestirý agenttiginiń Mańǵystaý oblysy boıynsha úılestirýshisi G. Qarabalaeva habarlady.
Jobanyń negizgi maqsaty – jastardy, ásirese, osal toptaryn qoǵamǵa beıimdeý jáne nátıjeli jumyspen qamtýǵa qajetti daǵdylardy damytý arqyly qoǵamdyq paıdaly qyzmetke tartý.
Joba 14-29 jas aralyǵyndaǵy jastarǵa (mektep jasyndaǵy oqýshylardy eseptemegende), ıaǵnı óz áleýetin, ómirlik daǵdylary men kóshbasshylyq qasıetterin damytýǵa baǵyttalǵan. Jobada erekshe basymdyq jumys istemeıtin jáne oqymaıtyn, sondaı-aq jumysy bola tura, tabysy tómen qatysýshylarǵa beriledi.
Joba aıasynda Mańǵystaý oblysynda 321 joba iske asyryldy, onda 1070-ke jýyq jas qatysyp, olar ózderiniń bastamalaryn iske asyrý úshin 1 000 000 teńge kóleminde granttar aldy. Sonymen qatar ómirlik daǵdylar men jobalardy basqarý boıynsha biregeı oqý baǵdarlamasynan ótý múmkindigi berildi. Jobalyq stıpendııalarǵa aı saıyn áleýmettik stıpendııa tólendi (túlekterge 60 000 teńge, qalǵan qatysýshylarǵa 40 000 teńge). Áleýmettik joba iske asyrylǵan kezeńde myna baǵyttar boıynsha kishi jobalar ashyldy: 93 aýyl sharýashylyǵynyń et jáne sút ónimderi, 26 bilim berý ortalyǵy, 17 demalys ortalyǵy men shyǵarmashylyq úıirmesi, 19 sport ortalyǵy men fıtnes klýby, 24 naýbaıhana men kondıterlik, 29 tigin jáne aıaq kıim sheberhanasy, 3 sulýlyq salony.
Jobany iske asyrýdaǵy mańyzdy kezeń – bul Mańǵystaý oblysynyń iske asyrylǵan áleýmettik jobalarynyń nátıjesin 2019 jyldyń 11 qarashasynda ótetin ónimder kórmesi men О́ńirlik forýmynda qorytyndylaý. Forým «Atameken» AES, «Damý» Qoǵamdyq qorynyń ókilderi, máslıhat depýtattary jáne Úılestirý agenttiginiń qyzmetkerleri, Mańǵystaý oblysynan qatysýshylar men joba tálimgerleriniń qatysýymen ótedi.