Qazirgi kezde barlyq BAQ ókilderi Qazaqstannyń áıgili kásipqoı boksshysy Gennadıı Golovkınniń polshalyq Kamıl Shermetamen judyryqtasatyny jaıynda jarysa jazýda. Al sol sportshy jaıynda biz ne bilemiz?
11 qazanda 30 jasqa tolǵan Kamıl 2012 jyldan beri kásipqoı rıngte kúsh synasyp júr. Sol aralyqta 21 kezdesý ótkizip, barlyǵynda jeńiske jetti. Bes kezdesýdi merziminen buryn aıaqtady. Osy tabysynyń arqasynda orta salmaqta Eýropa chempıony degen ataqqa qol jetkizdi.
Sońǵy ret ol 5 qazanda Nıý-Iorktegi áıgili Medıson Skver Garden kesheninde Gennadıı Golovkın men Sergeı Derevıanchenko arasynda ótken jekpe-jektiń anderkatynda meksıkalyq Oskar Kortesti ekinshi raýnda tehnıkalyq nokaýtpen utty. Búgingi tańda Polsha boksshysy WBC pen WBA nusqalary boıynsha úzdik úshtiktiń qatarynda.
Kezinde Kamıl Shermetanyń áýesqoılar arasynda da táýir judyryqtasqanyn aıta ketken abzal. Áli esimizde, 2010 jyly Polshada ótken Felıks Shtamnyń memorıalynyń fınaldyq saıysynda aıtýly boksshy qazaqtyń maqtanyshy Serik Sápıevpen kezdesti. Sol báseke polıak jigitiniń paıdasyna sheshilgen edi.