Bıyl oblys boıynsha barlyǵy 394 esirtki-quqyqbuzýshylyǵy anyqtalǵan. Bul týraly Mańǵystaý oblysy Polısııa departamenti bastyǵynyń orynbasary, polısııa podpolkovnıgi Altynbek Qalıev «О́ńirlik kommýnıkasııalar qyzmeti» alańynda bolǵan brıfıng barysynda málim etti.
-«Zańsyz aınalymnan 197 kg 865,6 gr ártúrli esirtki zattary tárkilendi, onyń ishinde 630,25 gr aýyr esirtki zaty «geroın». Esirtki qylmystaryn jasaǵany úshin barlyǵy 278 adam, onyń ishinde aýyr jáne asa aýyr qylmystar úshin – 31 adam jaýapkershilikke tartyldy, dedi Mańǵystaý oblystyq Polısııa departamenti bastyǵynyń orynbasary.
Al, avtokólik quralyn esirtki qoldanǵan mas kúıinde júrgizgeni úshin 48 ákimshilik quqyqbuzýshylyq anyqtalyp, ákimshilik jaýapkershilikke - 46 tulǵa tartylypty.
-Qazirgi ýaqytta zańnamalyq deńgeıde esirtkige qarsy zań normalaryna ózgerister engizý máseleleri sheshilýde: elektrondy aqparattyq resýrstarda esirtki zattaryn jáne psıhotroptyq zattardy daıyndaý, satyp alý, saqtaý jáne tasymaldaý týraly usynystardy ornalastyrý. Ekinshiden, esirtkini nasıhattaý nemese jarnamalaý arqyly esirtkini paıdalanǵany úshin jaýaptylyqty engizý, ol úshin balama jazalarmen qatar 4 jylǵa deıin bas bostandyǵynan aıyrý qarastyrylǵan. Eger bul qylmys elektrondyq aqparattyq resýrstardy qoldaný arqyly jasalǵan bolsa, jaza 3 jyldan 8 jylǵa deıin bas bostandyǵynan aıyrýdy qaraıdy. Bul normalar áli zańdy kúshine engen joq,- dedi A.Qalıev.
2019 jyly barlyǵy 3 esirtki prıtony anyqtalyp, oǵan qatysty barlyq tulǵalar uzaq merzimge qylmystyq jaýapkershilikke tartyldy. Qoldanylatyn shara jasalǵan qylmystyń aýyrlyǵyna baılanysty. Esirtki zatyn iri jáne kóp emes mólsherde qoldaný jáne saqtaý – 300 aılyq kórsetkish kóleminde aıyppul nemese 120-dan 240-saǵatqa deıingi qoǵamdyq jumys, nemese 45-ten 70-táýlikke deıin ákimshilik qamaýda ustaý jazasy qarastyrylǵan.
Mańǵystaý oblysy