Isataı aýdanynyń ortalyǵy Aqqystaý aýylynda halyq batyry, XVIII ǵasyrdaǵy sońǵy han bıligine qarsy ult-azattyq kóterilistiń qolbasshysy bolǵan Isataı Taımanulyna eskertkish ashyldy, dep habarlaıdy Atyraý oblysynyń О́ńirlik kommýnıkasııalar qyzmeti.
Isataı Taımanulyna arnalyp salynǵan eskertkishtiń avtory QR sýretshiler odaǵynyń múshesi, músinshi Serik Matenııazov. Bıiktigi 12 metr bolatyn eskertkish taza qoladan quıylǵan.
Saltanatty sharaǵa arnaıy qatysqan oblys ákiminiń birinshi orynbasary Serik Shapkenov Isataı batyr eskertkishi elimizdegi eń eńseli ári tuǵyrly músinniń biri ekendigin atap ótti.
- Mundaı shoqtyǵy bıik alyp eskertkishtiń naqty Isataı aýdanynda ashylýy zańdy qubylys. Bul istiń basy-qasynda bolyp, oıǵa alǵan jospardyń oıdaǵydaı oryndalyp, ýaqytyly ornatylǵany úshin jergilikti jaýapty tulǵalarǵa alǵys bildiremin. Búgingi mindetimiz – uly tulǵalarymyzdy ulyqtaý. Osy arqyly óskeleń urpaqty tárbıeleýimiz kerek. Naıza ustaǵan aıbarly Isataı batyr eskertkishi respýblıkadaǵy eń eńseli ári tuǵyrly músin. Barsha ısataılyqtardy aıtýly merekemen quttyqtaımyn, - deıdi Serik Shapkenov.
Eskertkishti oblystyq ardagerler qoǵamynyń tóraǵasy Qatımolla Rızýanov, oblystyq aýǵan soǵysy ardagerleri qoǵamy tóraǵasynyń orynbasary Beıimbet Narımanuly jáne aýǵan soǵysy jaýyngeriniń jesiri Qalıma Abýova ashty.
Aıta keteıik, shara aıasynda oblysqa tanymal ǵalym Amangeldi Shamǵonovtyń Isataı Taımanuly týraly jaqynda jaryq kórgen jańa kitabynyń tusaýy kesildi.