Temirtaýda energetıkalyq jáne kommýnaldyq sektorlardy jańǵyrtý aıasynda jylý jelilerin qaıta qurý boıynsha alǵashqy pılottyq jobalarynyń biri aıaqtaldy. Sonyń arqasynda eki shaǵyn aýdan men Otradnoe kentiniń turǵyndary kóp jyldan beri alǵash ret qystan apatsyz shyqty, dep jazady Egemen.kz.
Joba aıasynda jalpy uzyndyǵy 3,64 shaqyrym JM-2A jylý jelileri qaıta jańartyldy. Bul magıstral 36 jyl buryn salynǵan jáne sodan beri munda kúrdeli jóndeý júrgizilmegen. Sońǵy 5 jylda bul ýchaskede 31 ret apattyq jaǵdaı tirkelgen.
Energetıkalyq jáne kommýnaldyq sektorlardy jańǵyrtý jobasy metallýrgter qalasyndaǵy jylý jelileriniń jalpy tozý deńgeıin 75%-dan 73,8%-ǵa deıin tómendetýge múmkindik bergen Bul kórsetkish az bolyp kóringenimen, is júzinde 7,2 myńnan astam tutynýshy (jeke jáne zańdy tulǵalar, 3 mektepke deıingi balalar mekemesi, emhana, orta mektep) oń ózgeristi sezindi.
«Nysandaǵy jumystar aıaqtaldy. Qurylys kezinde barlyq jumys jobalaý-smetalyq qujattamaǵa sáıkes oryndaldy. 2025-2026 jyldardaǵy jylytý maýsymynda jylý magıstrali paıdalanýǵa berildi. Atalǵan ýchaskede qubyrdyń jarylýy men jylýdan ajyratý jaǵdaılary tirkelgen joq», delingen Tabıǵı monopolııalardy retteý komıtetiniń habarlamasynda.
Aıta keteıik, «Energetıkalyq jáne kommýnaldyq sektorlardy jańǵyrtý» ulttyq jobasy respýblıka boıynsha 2029 jylǵa deıin iske asady. Joba kommýnaldyq ınfraqurylymnyń tozýyn 40%-ǵa deıin tómendetýge jáne apat qaýpin 20% qysqartýǵa baǵyttalǵan.