Búgin Qazaqstan Respýblıkasynyń Prezıdenti – Qarýly Kúshterdiń Joǵarǵy Bas qolbasshysy Qasym-Jomart Toqaevtyń basshylyǵymen Qorǵanys mınıstrliginde memlekettik organdardyń birinshi basshylarynyń qatysýymen strategııalyq komandalyq-shtabtyq oqý-jattyǵýlary ótti. Bul týraly Aqordanyń baspasóz qyzmeti habarlady.
Memleket basshysyna oqý-jattyǵýlardyń negizgi mindetteri men kezeńderi týraly málimet berildi. Atalǵan oqý-jattyǵýlary qazirgi syn-qaterlerdi eskere otyryp, Qazaqstan Respýblıkasynyń qorǵanys júıesi men áskerı qaýipsizdigin saqtaý maqsatynda vedomstvoaralyq is-qımyldardy nyǵaıtýǵa baǵyttalǵan.
Oqý-jattyǵý barysynda elimizge tónetin syrtqy qaterlerdi boldyrmaý úshin áskerı jáne áskerı emes sıpattaǵy memlekettik sharalardy júzege asyrý máseleleri pysyqtaldy.
Memleket basshysy áskerı qaýipsizdik salasyndaǵy normatıvtik-quqyqtyq aktilerdi jetildirý, sondaı-aq, qorǵanys júıesi aldyndaǵy mindetterdi sheshý úshin memlekettik organdardy daıyndaý sharalaryn jolǵa qoıý jóninde birqatar tapsyrma berdi.
Oqý-jattyǵý sońynda Qasym-Jomart Toqaev ózderiniń áskerı boryshtaryn atqarý kezinde qaza tapqan Qazaqstan armııasynyń sarbazdary men ofıserleriniń rýhyna taǵzym etti.