«Batys» О́ńirlik qolbasshylyǵy jaýyngerlik daıarlyqty jetildirýdiń, áskerı men quqyqtyq tártipti nyǵaıtýdyń, áskerı qyzmet pen kúndelikti tirshilik etý máselelerin jaqsartýdyń negizgi baǵyttary boıynsha oqý-ádistemelik jıyn ótkizedi. Bul týraly Qorǵanys mınıstrliginiń baspasóz qyzmeti habarlady.
Atyraý qalasynyń áskerı bólimderi bazasynda Atyraý, Aqtóbe, Mańǵystaý jáne Batys Qazaqstan oblystarynyń aýmaǵyndaǵy áskerı bólimderden turatyn óńirlik qolbasshylyqtyń basshylyq quramymen oqý-ádistemelik jıyndar ótýde.
Jıynǵa qatysýshylar úshin jaýyngerlik daıarlyqty uıymdastyrý pánderi boıynsha sabaqtar ótkiziledi. Sondaı-aq komandırler dene daıyndyǵy boıynsha synaq tapsyryp, top boıynsha ár túrli sabaqtarǵa qatysady.
«Karabotan» oqý polıgonynda áskerı qyzmetshiler jaýyngerlik mashınalardy júrgizýdi uıymdastyrý, áskerı tehnıkany tıeý jáne tasymaldaý, jaýyngerlik atystardy uıymdastyrý jáne qol granatasyn laqtyrý tártibi boıynsha sabaqtarǵa qatysady.
«Jıyndardyń basty maqsaty – jaýyngerlik daıyndyq is-sharalaryn uıymdastyrý men ótkizýde komandalyq quramnyń ádistemelik daǵdylaryn jetildirý, áskerı qyzmettiń máselelerin jaqsartý jáne 2019 oqý jylyndaǵy óńirlik qolbasshylyqtyń jumysyn qorytyndylaý. Bıylǵy jyl jaýyngerlik daıyndyq pen kúndelikti ómir súrý turǵysynan mazmundy boldy, úlken jumystar atqaryldy», dep atap ótti «Batys» О́ńirlik qolbasshylyǵy áskerleriniń qolbasshysy polkovnık Nurlan Aldııarov.
Jıyn sońynda «Batys» óńirlik qolbasshylyǵy áskerleriniń barlyq baǵyttar boıynsha atqarǵan jumystary qorytyndylanady.