Elordada Aqparat jáne qoǵamdyq damý mınıstrliginiń muryndyq bolýymen uıymdastyrylǵan «Teambuilding» respýblıkalyq trenıngi ótti. Oǵan joǵary oqý oryndarynyń stýdentteri men magıstranttary, orta-arnaıy oqý oryndarynyń oqýshylary, aımaqtyq jastar jáne volonterlik uıymdardyń ókilderi, bilikti dintanýshylar, sondaı-aq tıisti mınıstrlik ókilderi qatysty.
Alqaly jıynǵa qatysqan Din ister komıteti tóraǵasynyń orynbasary Baýyrjan Bákirov:
– Búgingi tańda jastarymyzdyń qoǵamdyq belsendiligi artyp keledi. Bul qýantarlyq jaǵdaı. Osy belsendilikti biz jaqsy jaǵyna beıimdeı bilýimiz kerek. «Jastar – el bolashaǵy» degendi jıi aıtamyz. Olaı bolsa, sol bolashaǵymyzǵa shynaıy senim bildireıik, dep atap ótti.
Is-shara aıasynda «Áleýmettik jelidegi eń úzdik post-jarııalany», «Dinı ekstremızmge qarsy áreket boıynsha eń úzdik kreatıvti aksııa», «Eriktiler qozǵalysynyń eń úzdik uıymdastyrýshysy» nomınasııalary boıynsha antıekstremıstik qozǵalys kóshbasshylarynyń arasynda ótken baıqaý jeńimpazdary marapattaldy.
Baıqaý jeńimpazy Laýla Jumaǵalıeva:
–Osy sharany uıymdastyryp, jastardyń teris jolǵa túsip ketpeýine kóńil bólip otyrǵan mınıstrlikke alǵys aıtamyn. Bul jobaǵa qatysý arqyly kóp dos taptym, barlyǵyna sáttilik tileımin, dedi.
Aqparat jáne qoǵamdyq damý mınıstrligi buǵan deıin Almaty, Shymkent, Qaraǵandy, Aqtóbe jáne Oral qalalarynda eki kúndik oqytý semınarlaryn ótkizip, oǵan 300-den astam adam qatysqanyn aıta keteıik.
Bul sharanyń basty maqsaty – jastardyń boıynda antıkstremıstik sanany qalyptastyrý, dinı ekstremızm men terrorızmge qarsy is-qımyl máselelerinde quqyqtyq jáne azamattyq jaýapkershilik deńgeıin arttyrý. Qazaqstan jastarynyń radıkaldy jáne destrýktıvti dinı aǵymdarǵa qaıta oralýyna jol bermeý.
Aızere SAMARQAN