Halyqaralyq Túrki akademııasynyń uıymdastyrýymen Bishkek qalasynda búgin, 26 qarasha kúni “Bekem baýyrlastyq baılanystar” atty qazaq-qyrǵyz zııalylarynyń kezekti IV forýmy ótti. Bul týraly twesco.org habarlady.
Alqaly jıynǵa Qazaqstan Respýblıkasy Prezıdentiniń kómekshisi Máýlen Áshimbaev, Halyqaralyq Túrki Akademııasynyń prezıdenti Darhan Qydyráli, Qyrǵyz Respýblıkasy Prezıdentiniń keńesshisi Sultan Raev, Qyrǵyz Respýblıkasy Bilim jáne ǵylymı mınıstri Kanybek Isakov, Qazaqstan Respýblıkasynyń Qyrǵyz Respýblıkasyndaǵy Tótenshe jáne О́kiletti Elshisi Qaırat Nurpeıisov, Qyrǵyz Respýblıkanyń Jogorký Kenesh depýtattary, belgili memleket jáne qoǵam qaıratkerleri, eki eldiń tanymal ǵalymdary, akademıkter, ǵylymı ınstıtýt basshylary, zııaly qaýym ókilderi jáne jýrnalıster qatysty.
I.Arabaev atyndaǵy Qyrǵyz memlekettik ýnıversıtetiniń bas ǵımaratynda ótken forým qazaq-qyrǵyz baýyrlastyǵy men tulǵalar taǵylymyn arqaý etti.
Jıyn barysynda qazaq-qyrǵyz zııalylary baýyrlas elder arasyndaǵy yntymaqtastyq, ortaq rýhanı qundylyqtar jaıynda oı bólisip, jasalyp jatqan eseli eńbekterge oń baǵa berdi. Sondaı-aq, ádebıet, óner jáne ǵylym salasyndaǵy sabaqtastyqtyń ary qaraı túrki álemi men jahandyq mádenı baılanystarda alatyn orny týraly pikir alysty.
Osy oraıda, sóz alǵan Qazaqstan Respýblıkasy Prezıdentiniń kómekshisi Máýlen Áshimbaev ótken ǵasyrlarda eki eldiń dostyǵynyń nyǵaıýyna ult zııalylarynyń zor úlesin qossa, egemendik alǵan jańa dáýirde baýyrlas elderdiń arasyndaǵy yntymaqtastyqty QR Tuńǵysh Prezıdenti – Elbasy N. Nazarbaevtyń bastamasymen «Máńgilik dostyq» týraly shartqa qol qoıý arqyly nyǵaıta túskenin aıtty. Buǵan qosa ol zııaly qaýym arasyndaǵy yntymaqtastyq pen mádenı baılanys dástúriniń óskeleń urpaq úshin mańyzy zor ekenin, ony jastarǵa keńinen nasıhattaý kerek ekenine toqtaldy.
Sonymen qatar, Forým aıasynda Halyqaralyq Túrki akademııasy basyp shyǵarǵan úsh jańa kitaptyń tusaýkeser rásimi ótti. Atap aıtqanda O.Karaevtyń «Chagataıskıı ýlýs. Gosýdarstvo Haıdý. Mogolıstan» atty eńbegi, qazaq tiline alǵash ret tolyq aýdarylyp basylǵan qyrǵyz halqynyń tarıhı dastany «Er Esim» jáne Z.K.Kýrmanovtyń «Kyrgyzskıı fılıal partıı «Alash»: sozdanıe, deıatelnost, sýdba» atty kitaptary kópshilik nazaryna usynyldy.
Basqosýdan keıin forým delegattary Chon-Tash aýylynda ornalasqan, HH ǵasyrdyń 30 jyldardaǵy repressııa qurbandaryna arnalyp salynǵan «Ata-Beııt» memorıaldyq keshenine arnaıy baryp, gúl shoqtaryn qoıyp, taǵzym etti.
Aıta ketý kerek, qazaq-qyrǵyz zııalylarynyń alǵashqy basqosýy Túrki akademııasynyń bastamasymen 2018 jyldyń sáýir aıynda Nur-Sultan qalasynda ótken bolatyn. Budan keıin týysqan eki eldiń yntymaqtastyǵyna aıryqsha yqpal etken ıgi shara sol jylǵy qazan aıynda Osh qalasynda jalǵasyn tapty.
Sonymen qatar, Uly dalanyń máńgilik mırasy “Manas” dastany men kórnekti ǵalym Shoqan Ýálıhanov taǵylymyna arnalǵan úshinshi forým bıylǵy maýsym aıynda Jetisý jerinde uıymdastyryldy.
Qazaqstan Respýblıkasynyń Prezıdenti Qasym-Jomart Toqaevtyń Qyrǵyz eline resmı sapary qarsańynda Bishkek qalasynda ótken tórtinshi jıyn eki eldiń bekem baýyrlastyǵy taqyrybyna arnaldy.