Elbasynyń bastamasymen jarııalanǵan Jastar jyly sátti aıaqtaldy. Prezıdent Qasym-Jomart Toqaev Volonter jylynyń bastalýy rásimine arnalǵan sharada sóılegen sózinde «Elge qyzmet etý tek bilimdi ǵana emes, namysty da talap etedi. Jas urpaqtyń ar-namysy joǵary bolsa, memleketimizdiń mártebesi bıik bolady» dep atap kórsetti. Jastar jylynda óskeleń urpaqty qoldaý úshin kóptegen jumys atqaryldy.
Bıyl Jastar jylyna oraı uıymdastyrylǵan is-sharalardyń basy-qasynda bolǵanyma qýanamyn ári maqtan tutamyn. «Bolashaq» qaýymdastyǵy jastarymyzdy jan-jaqty damytýǵa arnalǵan birqatar respýblıkalyq jobany júzege asyrdy. Olardyń qatarynda «Jastar – Otanǵa!» ınnovasııalyq festıvali, Bolashaq business forum sekildi irgeli bastamalar bar.
Máselen, Netvorkıng jáne jastar uıymdarynyń tájirıbe almasýy jónindegi jobaǵa elimizdiń túkpir-túkpirinen 1000-ǵa jýyq jas qatysty. Barlyq óńirdi qamtyp, sharalardy uıymdastyrý boıynsha tıimdi aqparat pen tájirıbe almasý úshin aımaqtardaǵy ÚEU jastaryna qoldaý kórsetýdi kózdedik. Keleshekte de osy baǵyttaǵy jumysymyzdy jalǵastyra beremiz.
Keler jyly elimizdegi volonterlikti damytýǵa úlken úles qosatynymyzǵa senimim mol.
Laýra DEMESINOVA,
«Bolashaq» qaýymdastyǵynyń atqarýshy dırektory