«Rýhanı jańǵyrý» baǵdarlamasy aıasynda Almaty qalasynda ornalasqan respýblıkalyq sport kolledjinde Dáýlet Turlyhanov atynda zal ashyldy.
Dáýlet Bolatulyn jankúıerlerge tanystyryp jatýdyń ózi artyq. Desek te aıtýly azamattyń el sportyna sińirgen eńbegi eren ekeni anyq. Ol – grek-rım kúresinen KSRO-nyń jeti dúrkin chempıony, KSRO halyqtary spartakıadasynyń jeńimpazy, Seýl jáne Barselona Olımpıadasynyń júldegeri, dúnıe júzi, Eýropa jáne Azııa chempıony, qurlyqtyq oıyndarynyń jeńimpazy, álem kýbogynyń eki dúrkin ıegeri. Osylaı uzaqqa deıin tizbekteı berýge bolady.
Dáýlet Turlyhanovtyń atyndaǵy zaldyń ashylý salatanatyna QR Mádenıet jáne sport mınıstri Aqtoty Raıymqulova, Olımpıada chempıony Jaqsylyq Úshkempirov, respýblıkalyq sport kolledjdiń dırektory Amalbek Tshan, QR qol doby federasııasynyń prezıdenti Gúlnar Turlyhanova jáne taǵy basqa laýazymdy tulǵalar qatysty.
Belgili memleket jáne qoǵam qaıratkeri Amalbek Tshan basqaratyn respýblıkalyq sport kolledjinen talaı sańlaq sportshylardyń shyqqandary belgili. Olardyń arasynda Olımpııa oıyndary men álem chempıondary da jetip artylady. Alashtyń maqtan tutar azamaty Dáýlet Turlyhanov ta dál sol mektep-ınternattyń qabyrǵasynda tálim-tárbıe alǵan. Buıyrtsa, sol jeńispen órilgen dástúr aldaǵy ýaqytta da jalǵasyn tabatynyna senimdimiz.