Taraz qalasyndaǵy qordalanǵan máselelerdi ýaqyt sozbaı sheshý úshin túbegeıli zerdeleý men júıeli jospar qajet. Jergilikti turǵyndardyń da tilegi osy. Bul oraıda jergilikti bıliktiń oń sheshim qabyldaýy jáne jumysty júıeli júrgizýi kópshiliktiń máselesiniń jedel sheshilýine yqpal eteri anyq. Jambyl oblysynyń ákimi, «Nur Otan» partııasy oblystyq fılıalynyń tóraǵasy Asqar Myrzahmetov partııanyń Taraz qalalyq fılıalynda qoǵamdyq qabyldaý ótkizip, qabyldaýǵa kelgen turǵyndardyń tilek-ótinishterine nazar aýdardy.
Qabyldaýǵa kelgen Taraz qalasynyń turǵyny, zeınetker Nazym Nurbaeva ózi turatyn Zavodskaıa kóshesiniń 2-burylysyn jaryqtandyrý máselesin kóterdi. Bul oraıda Jambyl oblystyq energetıka jáne turǵyn úı-kommýnaldyq sharýashylyq basqarmasynyń basshysy Nurlan Aldamjarov atalǵan kósheniń kelesi jyly tolyǵymen jaryqtandyrylatynyn jetkizdi. О́z sózinde Asqar Myrzahmetov túgendeý barysynda qala boıynsha 700-den astam kóshe-burylystardyń anyqtalǵanyn, jalpy shahardaǵy 1500 kóshege zerdeleý uıymdastyryp, tolyǵymen jaryqtandyrý sharalaryn ýaqyt sozbaı oryndaýdyń mańyzdylyǵyna toqtaldy.
Ol úshin Taraz qalasynyń ákimi Aıtqazy Qaralabaevqa naqty mindetter júktep, eń áýeli turǵyndardyń asa alańdaýshylyǵyn týǵyzyp otyrǵan osyndaı túıindi túıtkilderdi ońynan tarqatýǵa kúsh salý kerektigin eskertti. Bul baǵyttaǵy jumystardy ońtaılandyrý arqyly az ýaqytta atqarýdyń joldaryn qarastyrý kerektigin aıtty.
Al, Qaldykúl Dosjanova qaladaǵy «Qarataý» shaǵyn aýdanyndaǵy №32 kópqabatty turǵyn úıdiń kúrdeli jóndeýden qashan ótetinin surady. Ákim kelesi jyly shahardaǵy 80 úı jańǵyrtýdan ótetinin tilge tıek etip, atalǵan turǵyn úı de sol tizimde bar ekenin aıtty. Atalǵan kópqabatty turǵyn úı mańyndaǵy aǵyn sý júıesiniń máselesine de aıryqsha kóńil bólgen oblys ákimi qaladaǵy barlyq sý júıeleriniń tazalyǵyn barlaý kerektigin tapsyrdy. Sondaı-aq, qabyldaýǵa kelgen kópbalaly ana Sháken Ahmetjanova óziniń 2010 jyldan beri turǵyn úı kezeginde turǵanyn aıtty. Búginde atalǵan tizimde ol 33-bolyp tur eken. Nátıjesinde kópbalaly ana aǵymdaǵy jyldyń sońyna deıin birqatar tarazdyqtarmen birge qonys toıyn toılaıtyn boldy. Oǵan jýyq arada arendalyq negizdegi páter kilti tabystalady.
Qabyldaýǵa jazylǵan ózge turǵyndar mektep oqýshylarynyń tasymaly, jumysqa ornalasý sekildi máselelerdi kóterdi. Ol boıynsha ákim tıisti basshylarǵa naqty hattamalyq tapsyrmalar júktedi. Al, Talant Nurǵojaevtyń Tájik-Aýǵan shekarasynda qurban bolǵan bes jaýyngerge eskertkish ornatý usynysy da qoldaýǵa ıe boldy. Asqar Myrzahmetov atalǵan shekarada áskerı boryshyn ótegen 700-den astam jambyldyqtyń bar ekenin eskerip, atalǵan usynys eskerýsiz qalmaıtynyn, eskertkishti «Jeńis» saıabaǵynan ashý jumystary júrgiziletin jetkizdi.
Jambyl oblysy