«Astana jastary» memlekettik mekemesiniń eriktileri jańa jyl qarsańynda «Ardagerlerdi ardaqtaıyq» aksııasyn ótkizdi. Bul týraly qala ákimdiginiń baspasóz qyzmeti habarlady.
«Astana jastary» JRO Eriktiler qozǵalysyn damytý bóliminiń jetekshisi Elvıra Esmuqanova búgingi shara aıasynda 11 ardagerge azyq-túlik sebeti taratylǵanyn atap ótti.
«Jańa jyl qarsańynda «Ardagerlerdi ardaqtaıyq» jáne «Adresa zaboty» aksııalaryn ótkizýdi jón kórdik. Bul aksııany biz 3 jyl boıy turaqty uıymdastyryp kelemiz. Shara aıasynda eriktiler jalǵyz basty nemese qaraýsyz qalǵan qart ardagerlerge azyq-túlik taratady jáne qystygúni aýla qaryn tazalaýǵa kómektesedi. Búgin biz 11 ardagerge azyq-túlik sebetin syıǵa tarttyq. Olardyń arasynda az qamtylǵan jáne tyl ardagerleri bar. Jalpy jyl basynan azyq-túlik taratý jumysyna 200 erikti qatysty», - dedi Elvıra Esmuqanova.
Bólim jetekshisiniń aıtýynsha, jalpy bıyldyqqa 145 azyq-túlik sebeti az qamtylǵan, tyl ardagerleri jáne kópbalaly otbasylarǵa taratylǵan.
«Bizde qalalyq ardagerler keńesi bar, olarmen tyǵyz baılanystamyz. Iаǵnı atalǵan keńes bizge kómekke muqtaj jandardyń tizimin beredi, biz óz kezegimizde olarǵa qol ushyn sozamyz. Bireýge azyq-túlik alyp bersek, ekinshisine úı aýlasyndaǵy qardy tazalaýǵa kómektesemiz. Ádette qar tazalaý jumysymen naýryz aıynda aınalysatynbyz. Degenmen, qar kóp túsip jatqandyqtan jumys kólemin azaıtý úshin osy bastan kiristik. Qar tazalaý jumysyna qys boıy 600-700 eriktini tartamyz», - dedi Elvıra Esmuqanova.