Májilis otyrysynda depýtat Ashat Aımaǵambetov Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıevke avtomatty qońyraýlar men baılanys operatorlary arasyndaǵy básekege qatysty saýal joldady, dep habarlaıdy Egemen.kz.
Depýtat zań jobasynda paıdaly bastamalar bar ekenin aıtqanymen, azamattardy mazalaıtyn avtoqońyraý máselesi áli sheshilmegenin synǵa aldy. Onyń sózinshe, bul másele komıtet otyrystarynda da kóterilgen, alaıda mınıstrlik avtomatty qońyraýlarǵa tyıym salý týraly normany qoldamaǵan.
Sondaı-aq Ashat Aımaǵambetov baılanys operatorlary sheteldik nómirler arqyly jasalatyn alaıaqtyq shabýyldarǵa qarsy qandaı tehnıkalyq sharalar qabyldap jatqanyn surady.
Budan bólek, depýtat mobıldi operatorlardyń ortaq ınfraqurylymdy paıdalaný tájirıbesin engizýdi usyndy. Onyń pikirinshe, Eýropa men AQSh-taǵydaı baılanys operatorlary jeke-jeke kabel tartpaı, ortaq jelilerdi qoldansa, bul básekeni arttyryp, tarıfterdiń arzandaýyna áser etýi múmkin.
О́z kezeginde Jaslan Mádıev avtomatty qońyraýlar máselesi áli de talqylanatynyn aıtty. Mınıstr qazirgi tańda naryqta úsh iri mobıldi operator jumys isteıtinin jáne jańa oıynshylardyń kelýi naryqtyń tabystylyǵyna baılanysty ekenin jetkizdi.
Onyń aıtýynsha, eger baılanys naryǵy tartymdy ári tıimdi bolsa, onda jańa operatorlardyń paıda bolýyna múmkindik týady.
Sonymen qatar elde telefon alaıaqtaryna qarsy jańa shekteýler engizý josparlanyp otyr.
Smartfonyńyzdy bógde adamǵa berýge bolmaıdy: Qazaqstanda jańa tyıym engizilmek
Aıta keteıik, Májilis pedagog mártebesi, bilim berý, densaýlyq saqtaý jáne bala quqyqtaryn qorǵaý máselelerine qatysty zań jobasyn maquldady.