Úkimet Energetıka mınıstrligi men «Kazakhstan Success Coking Energy» JShS arasyndaǵy Qaraǵandy oblysynda metallýrgııalyq koks óndiretin zaýyt salý boıynsha ınvestısııalyq kelisimdi maquldady. Premer-mınıstr Oljas Bektenov tıisti qaýlyǵa qol qoıdy, dep habarlaıdy Egemen.kz.
Joba aıasynda Qaraǵandy oblysy, Abaı aýdany, Dýbovka aýylynda qýattylyǵy jylyna 1 mıllıon tonnaǵa deıin metallýrgııalyq koks óndiretin kásiporyn salý kózdelgen.
Jalpy jeke ınvestısııa kólemi 63,5 mlrd teńgeni quraıdy. Sonymen qatar kásiporynda 500 turaqty jumys orny ashylady, al jerasty shahtasynyń qurylysy qosymsha 500 jumys ornyn qamtamasyz etedi.
Joba kómir shıkizatyn tereń óńdeýdi damytýǵa, joǵary qosylǵan quny bar ónim shyǵarýǵa jáne Qazaqstannyń ónerkásiptik áleýetin arttyrýǵa baǵyttalǵan. О́nim metallýrgııa, energetıka, aýyl sharýashylyǵy jáne farmasevtıka salalarynda keńinen qoldanylady.
«Zaýyt qurylysy kómir shıkizatyn tereń óńdeýdi damytýǵa, joǵary qosylǵan quny bar ónim shyǵarýǵa jáne Qazaqstannyń ónerkásiptik áleýetin nyǵaıtýǵa baǵyttalǵan. Kómir hımııasy ónimderi energetıka, aýyl sharýashylyǵy, metallýrgııa, farmasevtıka jáne basqa da salalarda keńinen qoldanylady. Ishki naryq tolyq qamtylǵan soń, artyq ónim eksportqa shyǵarylady», delingen habarlamada.
Radıoaktıvti qaldyqtarmen jumys isteıtin ulttyq operator ınstıtýty qurylady
Alǵashqy kezeńde zaýyt jylyna 500 myń tonna koks óndiredi, al 2031 jylǵa qaraı tolyq qýatqa shyǵýy josparlanyp otyr. Sondaı-aq ınvestor qurylys barysynda otandyq óndirýshilerdiń taýarlaryn, jumys kúshin jáne qyzmetterin paıdalanýǵa basymdyq berýge mindetteme alady.
Eske sala keteıik, buǵan deıin marketpleısterge «Qazaqstanda jasalǵan» belgisi bar otandyq taýar tańbasyn engizý mindettelgen bolatyn.
Nurbolat AMANBEK