«О́skemen – Almaty» baǵyty boıynsha qatynaıtyn №351 jolaýshylar poıyzynda náreste dúnıege keldi. Vıktorııa Marochkına boıy 46 sm, al salmaǵy 2,7 kılo ul balany jaryq dúnıege ákeldi.
Sapar barysynda jolaýshy tolǵata bastaǵan soń, poıyz basshysy jaqyn mańda ornalasqan Jarma stansasyna jedel járdem shaqyrtty. Biraq Vıktorııa Marochkına stansaǵa jetpeı, jolserikter men poıyzda jol júrip kele jatqan dárigerdiń kómegimen aman-esen bosandy. Balaǵa Matveı degen esim berilip, anasymen birge Jarmadaǵy perınataldy ortalyqqa jetkizildi.
Al náresteniń ákesi Valera telefon arqyly osy qýanyshty jaǵdaıǵa atsalysqan barsha azamattarǵa óziniń sheksiz alǵysyn bildirdi.
Ulttyq tasymaldaýshy ana men balaǵa zor densaýlyq tileıdi.