Qurlyqtyq hokkeı lıgasynda (QHL) kúsh synasyp júrgen «Barys» kezekti týr oıynyn Nıjnekamskide jergilikti «Neftehımıkke» qarsy ótkizdi.
Birinshi kezeńde esep ashylmaǵanymen, qyzyqtyń bári sodan keıin bastaldy. Aınaldyrǵan 10 mınýt aralyǵynda «Neftehım Arenaǵa» jınalǵan kórermender torda týlaǵan tórt birdeı shaıbanyń kýási boldy. Atap aıtsaq, 31-mınýtta Darren Dıs qonaqtardy alǵa shyǵarsa, 35-mınýtta Arsen Hısamýtdınov tarazy basyn teńestirdi.
Bul jaǵdaı «Barystyń» hokkeıshilerin qanaǵattandyrmady. Kerisinshe, namysyn qamshylaı tústi. 35 jáne 37-mınýttarda Arkadıı Shestakov pen Atte Ohtamaa qatarynan eki gol soqty.
Úshinshi kezeń de qazaqstandyq komandanyń basymdyǵymen ótti. 42-mınýtta Korban Naıt býlıtti sátti oryndasa, 51-mınýtta Nıkıta Mıhaılıs matchtyń sońǵy núktesin qoıdy. Esep – 1:5.
Bul kúnge deıin 45 oıyn ótkizip, 59 upaı jıǵan «Barys» turaqty birinshiliktiń jarys kestesinde jetinshi oryndy ıelenýde. Al Shyǵys konferensııasynda olar úshinshi satyǵa jaıǵasty.