Atyraý oblysynyń Jylyoı aýdany aýmaǵyndaǵy «Teńiz» kenishinde eki jumysshynyń 5 metr bıiktiktegi satydan qulaǵany belgili boldy. Oblystyq tótenshe jaǵdaılar departamentiniń baspasóz qyzmetiniń habarlaýynsha, oqys oqıǵa «Teńizshevroıl» birlesken kásipornynyń ıgerýindegi alyp kenishte oryn alǵan. Birlesken kásiporynnyń uzaq jyldardan bergi turaqty merdigerleriniń birinen sanalatyn «Denholm Joldas» JShS-niń eki jumysshysy KTL-2 qondyrǵysyndaǵy qurylys satylaryn buzý barysynda 5 metrlik bıikten qulaǵan.
Jaraqat alǵan jumysshylar aldymen «Teńizshevroıldyń» emhanasyna, keıinnen tikushaqpen Atyraý qalasyndaǵy oblystyq aýrýhanaǵa jetkizilgen. Qazir olardyń biri jan saqtaý bólimine jatqyzyldy. Al «jabyq bas súıek-mı jaraqaty jáne omyrtqanyń zaqymdanýy» dıagnozy qoıylǵan ekinshi jumysshyǵa neırohırýrgııa bóliminde dárigerlik em-dom kórsetilýde.
Joldasbek ShО́PEǴUL,
«Egemen Qazaqstan».
Atyraý oblysy.