El Prezıdenti Qasym-Jomart Toqaev óz Joldaýynda áleýmetke qatysty birqatar tapsyrmalar bergen bolatyn. Sonyń biri – kópbalaly otbasylarǵa áleýmettik jaǵynan barynsha qoldaý bildirý. Osy tapsyrma aıasynda Túrkistan oblysynda oblys ákimi О́mirzaq Shókeevtiń bastamasymen qolǵa alynǵan «Qamqorlyq» jobasy júzege asa bastady. Bul týraly Túrkistan oblysy ákimdiginiń baspasóz qyzmeti habarlady.
«Biz jaǵdaıy tym tómen, krızıstik jáne qanaǵattanarlyqsyz deńgeıde ómir súrip jatqan 2000-ǵa jýyq otbasyn anyqtap, olardyń árqaısysyna materıaldyq kómek pen qajetti keńes beretin arnaıy kýrator taǵaıyndaımyz. Arnaıy kýratorlar retinde bekitilgen mekeme basshylary, depýtattar jáne qoǵam qaıratkerleri bul otbasylarǵa bólingen qarjy jáne óz qarajattarynan olardyń jaǵdaıyn qanaǵattanarlyq deńgeıge jetkenshe kómek beretin bolady. Budan bólek, «Qamqorlyq» baǵdarlamasy arqyly januıa múshelerin jumysqa turǵyzý, oqytý jáne ózge de máseleler tikeleı óz baqylaýymda bolady» dedi oblys basshysy.
Aıta keteıik, jańa baǵdarlama memleket tarapynan beriletin járdemaqy men kómekten bólek júzege asady. Iаǵnı, turmys taýqymetin tartqan jandarǵa jan-jaqty qamqorlyq kórsetý arqyly, kedeılik sheńberinen shyǵýǵa múmkindik beredi.
Nebári bir aptanyń kóleminde Keles, Jetisaı, Maqtaaral, Qazyǵurt, Saıram aýdandaryndaǵy qoldaýǵa asa muqtaj 100-den astam otbasyǵa naqty kómek kórsetilgen. Qaıyrymdy iske óńirimizdegi erikti jastar men jergilikti depýtattar jáne demeýshiler atsalysa bastady.
Búgingi tańda jobany júzege asyrý aıasynda О́mirzaq Estaıulynyń pármenimen aýdan, qala ákimderi men oblystyq «Nur Otan» partııasy fılıaldary belsendi jumys júrgizýde. Sondaı-aq, barlyq aýdan, qalalarda arnaıy komıssııa qurylyp, onyń quramynda aýyl aqsaqaldary men jergilikti belsendiler jumys isteýde.
«Qamqorlyq» baǵdarlamasy sheńberinde Qazaqstan Respýblıkasy Prezıdentiniń 2019 jyldyń qarasha aıynda Nur-Sultan qalasynyń «Januıa» otbasy ınstıtýtyn qoldaý ortalyǵynyń tájirıbesine súıenip, barlyq óńirlerde osyndaı ortalyqtardy qurý jóninde tapsyrma bergen bolatyn. Bıyl shilde aıynda osy tektes ortalyqty «Qamqorlyq» baǵdarlamasynyń sheńberinde Túrkistan qalasynda ashylady dep josparlanýda.