Aýǵanstan astanasy Kabýldan memlekettiń soltústik-batysyndaǵy Gerat qalasyna baǵyt alǵan ushaq Gaznı provınsııasy mańynda qulady. Laıner bortynda 83 jolaýshy bolǵan. Tiri qalǵandar týraly aqparat ázirge joq.
Jergilikti aqparat quraldarynyń habarlaýynsha, ushaq Ariana Afghan Airlines áýe kompanııasyna tıesili. Alaıda atalǵan áýe kompanııa ushaǵynyń qulamaǵanyn, bul apattyń kompanııaǵa qatysy joǵyn aıtty. Kompanııa basshysy Mırýeı Mırzakýal Reuters agenttigine Kabýldan Geratqa ushqan ushaǵynyń sátti qonǵanyn, ekinshi reıstiń de jospar boıynsha ushatynyn málimdedi. Gaznı provınsııasynyń gýbernatory Arıf Nýrı apattyń Deh Iаk aýdanynda bolǵanyn málimdedi. Onyń aıtýynsha, ushaq qulaǵannan keıin, órt shyqqan.
Apat jergilikti ýaqyt boıynsha shamamen 13:10-da bolǵan. Áýe kemesi aýǵan armııasyna tıesili degen aqparat ta bar. Tolo News agenttigi ushaqtyń «Talıban» qozǵalysynyń baqylaýyndaǵy aýmaqqa qulaǵanyn jazady. Bul málimdeme negizsiz emes. О́ıtkeni apat ornyna «Talıbannyń» jaýyngerleri alǵashqy bolyp kelgen. Olar órtengen ushaqty sóndirýge tyrysqan. «Talıban» qozǵalysynyń ókili Zabıýlla Mýdjahıd kelip túsken habarlamany tekserý úshin oqıǵa ornyna qozǵalystyń adamdary barǵanyn jetkizdi. Memlekettiń tótenshe jaǵdaılar komıteti qyzmetkerleri de apat ornyna jiberiletini habarlandy.
Aýǵanstanda iri ushaq apaty sońǵy ret 2005 jyly bolǵan. Ol kezde de Gerattan Kabýlǵa bet alǵan Kam Air kompanııasynyń ushaǵy taýǵa jaqyn mańda qulaǵan bolatyn.