Nazarbaev Ýnıversıtetinde Qazaqstandyq Trıatlon federasııasynyń jyl saıynǵy kongresi ótti. Bul týraly atalǵan federasııanyń baspasóz qyzmeti habarlady.
Kongress QTF prezıdenti K.Q. Másimovtiń tóraǵalyǵymen ótti. Kongreske Mádenıet jáne sport mınıstri Aqtoty Raıymqulova, Mádenıet jáne sport vıse-mınıstri Eldos Ramazanov, QR UOK bas hatshysy Sáken Musaıbekov, Sport jáne dene shynyqtyrý isteri komıteti tóraǵasynyń orynbasary Serik Jarasbaev, astana ákimi Altaı Kólginov, Baqylaýshy keńesiniń tóraǵasy — ERG tobynyń bas atqarýshy dırektorynyń birinshi orynbasary Aldııar Qaztaev jáne t.b. qonaqtar qatysty. Federasııanyń jańa prezıdentti saılaý – Kongress jumysynyń basty nátıjesi ári qazaqstandyq trıatlon úshin basty jańalyq boldy.
О́kilettilik merziminiń aıaqtalýyna baılanysty Kongress músheleri jańa prezıdentti jáne birinshi vıse-prezıdentti ashyq daýys berý jolymen saılady. Jıynǵa qatysýshylar Aldııar Qaztaevty bir aýyzdan QTF jańa prezıdenti etip saılady. Kárim Másimov QTF Qurmetti prezıdenti bolyp saılandy. Orta Azııalyq Trıatlon Assosıasııasynyń (SATA) prezıdenti jáne Almaty Triathlon Federation basshysy Ǵalymjan Esenov QTF birinshi vıse-prezıdenti bolyp saılandy.
Eske sala ketsek, K.Q. Másimov 2016 jyly, trıatlon Qazaqstan úshin salystyrmaly túrde jas ári asa tanymal emes sport túri bolyp turǵan shaqta federasııa prezıdenti bolyp saılanǵan edi. Kárim Másimovtiń basshylyǵymen qazaqstandyq trıatlon josparly ári keshendi damý jolyn ótti. Dálirek aıtqanda: uıymnyń normatıvti-quqyqtyq bazasy jetildirildi, federasııanyń jumysyn basqaratyn profıldi komıtetter quryldy, basty halyqaralyq trıatlon uıymdarymen (ITU, ASTC, Ironman (WTC)) jaqsy qarym-qatynas ornatyldy, el aımaqtarynda akkredıttelgen federasııalar, olımpıadalyq rezervtegi balalar-jasóspirimder mektepterinde trıatlon bólimsheleri men seksııalary ashyldy.
Sondaı-aq Nur-Sultan, Almaty jáne Shymkent qalalarynda ITU, ASTC, Ironman birlesken aýqymdy halyqaralyq saıystar ótkizildi, elimizdiń barlyq derlik aımaqtarynda respýblıkalyq deńgeıdegi saıystar uıymdastyryldy. Úlken halyqaralyq dodalarda ulttyq qurama músheleri jaqsy nátıjeler kórsetti jáne de ádestemelik qujattar shyǵarylyp, bilikti bapkerler tárbıeleý isinde de birshama jetistikterge qol jetkizildi.
Sonymen qatar áýesqoılyq trıatlonnyń damýyna úlken serpilis bergen «TEMIRADAM» Kýbogi quryldy. K.Q. Másimovtiń basshylyǵy kezindegi federasııanyń basty jetistikteri retinde QTF ókilderiniń Azııalyq Trıatlon konfederasııasynyń (ASTC) Atqarýshy keńesine jáne profıldi komıtetterine daýys berý quqyǵymen saılanyp engendigin, Qyrǵyzstan, О́zbekstan, Iran, Aýǵanstan jáne Qazaqstan sekildi bes eldiń ulttyq federasııalaryn biriktirgen Orta Azııalyq Trıatlon Assosıasııasynyń (SATA) qurylýyn ataýǵa bolady.
«Búgingi tańda qazaqstandyq trıatlon óz damý jolynda úlken serpilis jasady. Federasııa aıtarlyqtaı jetistikterge qol jetkizdi. Bul birlese atqarǵan jumys pen dana basshylyqtyń arqasynda ekendigin senimdi túrde aıtýǵa bolady. Ulttyq federasııany basqarý úlken abyroı ári jaýapkershilik. Bizdiń trıatlonǵa júıeli ári keshendi ósim qamtamasyz ete otyryp, qalyptasqan dástúrdi saqtaý kerek. Bul úshin barlyq kúshimdi jumsaýǵa nıettimin», - dedi Aldııar Qaztaev.
Budan basqa Kongreste federasııanyń ótken jyly atqarǵan jumysy boıynsha esep tyńdalyp, kele jatqan olımpıadalyq maýsymǵa negizgi maqsattar qoıyldy.