Taıaý Shyǵystaǵy áskerı-saıası jaǵdaıdyń ýshyǵýyna baılanysty el azamattaryn evakýasııalaý áli de jalǵasyp jatyr. Syrtqy ister mınıstrliginiń resmı ókili Erlan Jetibaev ýákiletti organdarmen birlese atqarylyp jatqan jumystardyń jaı japsaryn baıandady. Bastysy, qaýipti aımaqtarda zardap shekken nemese opat bolǵan el azamattary joq, dep habarlaıdy Egemen.kz.
Evakýasııa bastalǵaly beri ýákiletti memlekettik organdardyń, sondaı-aq rezıdent jáne rezıdent emes áýe kompanııalarynyń kómegimen 8 585 azamat elge qaıtarylǵan. Aldaǵy kúnderi Izraılden 78 azamatty, Qatardan shamamen 350 adamdy, Birikken Arab Ámirlikterinen shamamen 550 adamdy, Saýd Arabııasynan shamamen 300 adamdy evakýasııalaý josparlanyp otyr. Kórsetilgen derekter ózgerýi múmkin.
«Biz otandastarymyzdyń qaýipsizdigin qamtamasyz etý úshin bar kúsh-jigerimizdi jumsap, kez kelgen jaǵdaıda jan-jaqty qoldaý kórsetip kelemiz», dedi vedomstvonyń resmı ókili.
Azamattardy elge shyǵarý tek áýe reısterimen shektelmeıdi. Jerústi joldarymen de evakýasııa tásilderi bar. Atap aıtqanda, Ázerbaıjan, Armenııa jáne Túrikmenstannyń qurlyqtaǵy shekaralary arqyly azamattar otanyna aman-esen oralyp jatyr. Máselen, Irannan 66 qazaqstandyq elge osylaı qaıtqan.
«Bir lıtr de munaı shyqpaıdy»: Iran Ormuz buǵazyn tolyq baqylaýǵa aldy
Sonymen qatar Taıaý Shyǵystaǵy soǵys órti órship, áýe keńistiginiń jabylýyna baılanysty Qazaqstan azamattaryna óńirdegi birqatar memleketke barýdan ýaqytsha bas tartý usynyldy. Ásirese Bahreın, Mysyr, Izraıl, Iemen, Iordanııa, Iran, Katar, Saýd Arabııasy, Túrkııa, Lıvan, Birikken Arab Ámirlikteri, Oman jáne Sırııaǵa saparlardy keıinge qaldyrýǵa keńes berildi.
О́ńirde júrgen azamattarǵa jeke qaýipsizdik sharalaryn kúsheıtip, qaýipti aýdandardan aýlaq bolý, jergilikti bılik organdarynyń nusqaýyn oryndaý jáne zymyrandyq qaýip týyndaǵan jaǵdaıda panalaý oryndaryna barý qajettigi eskertildi. Sondaı-aq dıplomatııalyq ókildiktermen, týroperatorlarmen jáne áýe tasymaldaýshylarymen turaqty baılanysta bolý usynyldy.
Syrtqy ister mınıstrliginiń málimetinshe, buǵan deıin jarııalanǵan eskertýlerge qaramastan, keıbir azamattar atalǵan elderge sapar josparlap otyr. Osyǵan baılanysty vedomstvo jaǵdaı tolyq turaqtanǵanǵa deıin mundaı saparlardy josparlaýdan bas tartýǵa shaqyrdy.
Pýtın AQSh-tyń Irandaǵy operasııasyna tańdanys bildirdi
Buǵan qosa mınıstrlik shetelde ótetin referendýmǵa daıyndyq týraly da aqparat berdi. Vedomstvoda arnaıy shtab qurylyp, uıymdastyrý jumystary júrgizilip jatyr. Taıaý Shyǵystaǵy áskerı-saıası jaǵdaıdyń kúrdelenýine, sondaı-aq Ýkraına men Efıopııadaǵy qaýipsizdik deńgeıiniń tómen bolýyna baılanysty 10 eldegi 11 saılaý ýchaskesiniń jumysy ýaqytsha toqtatyldy.
Olardyń qatarynda Qazaqstannyń Iran, Izraıl, Iordanııa, Katar, Birikken Arab Ámirlikteri, Oman, Lıvan, Kýveıt, Ýkraına jáne Efıopııadaǵy dıplomatııalyq ókildikteri janyndaǵy, sondaı-aq Dýbaı qalasyndaǵy Qazaqstan konsýldyǵy janyndaǵy ýchaskeler bar.
Ermek Kósherbaev Izraıldiń Syrtqy ister mınıstrimen sóılesti
Osylaısha referendým kezinde 54 elde 71 saılaý ýchaskesi jumys isteıdi. Sheteldegi saılaýshylardyń jalpy sany 14 230 adamdy quraıdy.