Kókshetaý qalasynda áıel adamdy qaǵyp óltirgen júrgizýshi ustalyp, ýaqytsha ustaý ızolıatoryna qamaldy. Sońǵy málimetter boıynsha, qaza tapqan áıeldiń artynda 12 jasar balasy qalǵan, dep habarlaıdy Egemen.kz.
Aqmola oblystyq Polısııa departamentiniń baspasóz qyzmetiniń málimetinshe, kúdikti resmı túrde ustalyp, ızolıatorǵa qamalǵan.
Oqıǵa ornyndaǵy kórshiler men kýágerlerdiń aıtýynsha, qaza tapqan áıel jalǵyzbasty ana bolǵan jáne 12 jasar perzentin jalǵyz ózi tárbıelep ósirip otyrǵan.
Eske sala keteıik, buǵan deıin áleýmettik jelilerde jol talǵamaıtyn kóliktiń burylys jasaý kezinde jaıaý júrginshini qaǵyp ketkeni týraly beınejazba taraǵan bolatyn. Aýyr tehnıka áıeldi qaǵyp qana qoımaı, ol toqtaǵan kezde de zardap shegýshi kólik astynda qalyp qoıǵan. Alǵan jaraqattarynyń saldarynan ol oqıǵa ornynda kóz jumdy.
Atalǵan fakti boıynsha qylmystyq is qozǵalyp, tergeý amaldary jalǵasyp jatyr.