Amerıkalyq 22 jastaǵy bloger áleýmettik jelidegi jazylýshylarymen birge bankrotqa ushyraǵan Spirit Airlines áýe kompanııasyn satyp alý úshin erekshe naýqan bastady. Nebári birneshe kúnniń ishinde ol 132 mıllıon dollar jınap úlgergen, dep habarlaıdy Egemen.kz.
Blogerdiń bul bastamasy jelide lezde vırýsqa aınaldy. Jobanyń negizgi ıdeıasy – bankrot bolǵan Spirit Airlines kompanııasyn «halyqtyq» avıatasymaldaýshyǵa aınaldyrý.
Avtordyń jospary boıynsha, avıakompanııany satyp alýǵa qarjy qosqan árbir qatysýshy:
Mańyzdy sheshimder qabyldaý kezinde daýys berý quqyǵyna ıe bolady; Áýe bıletterine arnalǵan arnaıy jeńildikterdi paıdalana alady.Jobaǵa degen qyzyǵýshylyqtyń joǵary bolǵany sonshalyq, kraýdfandıng platformasynyń saıty kelýshilerdiń kóptiginen isten shyqqan. Qazirgi ýaqytta uıymdastyrýshylar jańa ótinimderdi qabyldaýdy ýaqytsha toqtatty.
Jeli qoldanýshylary bul bastamany «avıasııadaǵy revolıýsııa» dep baǵalap jatqanymen, sarapshylar saqtyq tanytyp otyr. Mamandardyń aıtýynsha, avıakompanııany satyp alý jáne ony basqarý kúrdeli zańnamalyq jáne qarjylyq retteýdi talap etedi. Sondyqtan bul erekshe jobanyń sońy nemen aıaqtalary ázirge belgisiz.
Aıta keteıik, Spirit Airlines – AQSh-taǵy eń iri loýkosterlerdiń biri bolǵan, alaıda sońǵy ýaqytta qarjylyq qıyndyqtarǵa baılanysty bankrottyq týraly aryz bergen bolatyn.
Buǵan deıin Amerıkalyq «Frontier Airlines» áýe kompanııasynyń «Airbus A321» ushaǵy Denver halyqaralyq áýejaıynda ushý jolaǵynda adamdy qaǵyp ketkenin jazǵan edik.