Qazaqstanda respýblıkalyq referendýmǵa daıyndyq aıasynda daýys berý ýchaskeleriniń barlyq azamatqa qoljetimdi bolýyna erekshe nazar aýdarylyp otyr. Osy baǵyttaǵy jumystardy pysyqtaý maqsatynda Ortalyq referendým komıssııasynyń músheleri eldiń barlyq óńirine ınspeksııalyq saparlar jasap, ýchaskelerdiń jabdyqtalý deńgeıin tekserdi, dep habarlaıdy Egemen.kz.
Ortalyq referendým komıssııasynyń tóraǵasy Nurlan Ábdirovtiń aıtýynsha, daýys berý ýchaskelerin zańnama talaptaryna tolyq saı ázirleý qajettigi, ásirese múgedektigi bar adamdar úshin qolaıly ári kedergisiz orta qalyptastyrý máselesine basymdyq berilgen.
Almatydaǵy referendýmǵa daıyndyq barysy
«Búginde barlyq daýys berý ýchaskelerinde múgedektigi bar azamattarǵa arnalǵan arnaıy buryshtar jabdyqtalǵan. Onda kompıýterler, úlkeıtkish áınekter, qosymsha jaryq kózderi, daýys berý bıýlletenine arnalǵan Braıl qarpindegi trafaretter, sondaı-aq Konstıtýsııa jobasynyń memlekettik jáne orys tilderindegi aýdıo nusqalary qarastyrylǵan. Sonymen qatar, ýchaskeler pandýstarmen, kireberistegi taktıldi kórsetkishtermen jáne ǵımarat ishindegi taktıldi navıgasııa quraldarymen qamtamasyz etilgen. Al mundaı jabdyqtar áli tolyq ornatylmaǵan nysandarda jergilikti atqarýshy organdar ýaqytsha pandýstar men taktıldi baǵyttaǵyshtardy ornalastyrý jumystaryn qolǵa alǵan. Bul múgedektigi bar adamdardyń daýys berý ýchaskelerine esh kedergisiz kirýine múmkindik beredi», dedi Nurlan Ábidrov.
Daýys berý kúni de qosymsha qoldaý sharalary qarastyrylǵan. Atap aıtqanda, múgedektigi bar azamattar úshin ınvataksı qyzmeti men sýrdoaýdarmashylardyń kómegi usynylady. Bul olardyń referendýmǵa tolyqqandy qatysýyna jaǵdaı jasaýdyń mańyzdy tetigi bolmaq.
«Komıssııa múshelerin daıarlaý isi de nazardan tys qalǵan joq. Ýchaskelik komıssııalardy qosa alǵanda, komıssııa músheleri múgedektigi bar adamdardyń quqyqtary men qajettilikterine qatysty arnaıy oqytýdan ótti. Oqý barysynda qarym-qatynas ádebi, durys termınologııany qoldaný jáne múgedektigi bar azamattardyń túrli sanattarymen tıimdi jumys isteý erekshelikteri keńinen túsindirildi», dedi ORK tóraǵasy.
Referendým-2026: Saılaý ýchaskesin eGov Mobile arqyly tekserýge bolady
Budan bólek, elimizdiń úsh óńirinde – Aqtóbe, Qostanaı jáne Pavlodar oblystarynda pılottyq joba aıasynda múgedektigi bar adamdarǵa arnalǵan jańa ınnovasııalyq sheshimder engizilgen bir-birden arnaıy daýys berý ýchaskesi jumys isteıdi.
Osylaısha, respýblıkalyq referendýmǵa daıyndyq barysynda ınklıýzıvti orta qalyptastyrýǵa baǵyttalǵan naqty sharalar qolǵa alynyp otyr. Bul ár azamattyń óziniń konstıtýsııalyq quqyǵyn teń jaǵdaıda jáne qolaıly ortada júzege asyrýyna múmkindik beredi.