Qazirgi jastar baqytty. Ata-anasy qaryzdanyp, qaýǵalanyp toıyn jasap beredi. Toı bolǵanda qandaı?! Túrli taǵam qoıylǵan dastarqanda qustyń sútinen basqanyń bári bar.
Ulttyq dástúr de túrlenip keledi. Jaǵdaıy tolaıym jetip turǵan toı ıesi qansha qymbat bolsa da ónerpazdardy murnynan tizip shaqyrady-aq. Eń qyzyǵy betashar. Túneýkúni tonnyń ishki baýyndaı aralasatyn aǵaıynnyń biri kenjesin úılendirdi. Baryn kıip, baılaýyn taqqan toq jurt. Sál keshtetip keldik. Oqasy joq, bizdiń Kókshetaýda shaqyrǵan ýaqyttan eki-úsh saǵat keshigip kele beredi. Osy ýaqytqa deıin aıtylǵan saǵatynda bastalǵan toıdy kórmeppin.
Bul joly da solaı boldy. Pálenshekeń kelmeı jatyr, túgenshekeń jol ústinde eken degen habar emis-emis jetip jatyr. Áldekimderdi saryla tostyq. Qonaqtyń deni jınalǵan. Shydamymyz taýsyla bastaǵan kezde betashar bastaldy. Aıtpaqshy, sekseninshi jyldary Kókshetaýda betashar sırek aıtylatyn. Tipti bet ashatyn ánshi taba almaı apalaqtaǵandardy talaı kórgenbiz. Qazir táp-táýir jóndelip qaldy. Ekiniń biri bolmasa da, dombyrasyn sabalap bet ashyp beretin ónerpaz tolyp jatyr jáne ózderi toıǵa jınalǵan aǵaıyndy naǵashy, jıen, áriptes degen sııaqty top-topqa bólip, esimderin qaǵazǵa jazyp alyp, aıtyp shyǵady. Aty atalyp turǵan soń tabaqqa teńge salmaý uıat. Uıalǵandarynan ulttyq valıýtanyń birer teńgesin tastap, paryzynan qutylady. Áýpirimdep tabaq tolady. Ánshiniń de kóńili toq.
Mine, betashar bastaldy. Áýeli atasyn tanystyrǵan. Shamasy eski mátin bolýy kerek, «keýdesine orden taqqan» dep bir qoıdy. Bizdiń bilýimizde toı ıesi orden túgil medal taqpaǵan jan edi. Ras, el qatarly jumys isteıdi. Qaıyn enesin tanystyrǵanda da qaǵys ketti.
Kelin qaraǵym ıilip sálem bermedi. Tipti meziretin de jasaǵan joq.
– Mynanyń aıaǵy aǵash qusap qatyp qalypty ǵoı, – dedi aýyldan kelgen jeńgesi, – tipti basyn da ıgen joq!
– Sharýań qansha, jastar óz bilgenin isteı bersin, – dep janynda turǵan apaı basý aıtty.
– Osy kelinniń túskenine tórt-bes aı bolyp qaldy-aý deımin. Endi betashar aıtyp turǵany nesi?! – dedi bir apaı.
– Jaıyńa tur, – dedi ekinshisi, – dástúrimiz emes pe?..
– Negizi betashardy kelin bosaǵadan attaǵan sátte, osydan bes aı buryn ótkizgen durys edi, – dedi jigit aǵasy, – sonda áldeqaıda jarasymdy bolar edi.
Bul kezde ánshi jigit ashy ishekteı jubatylǵan betasharyn aıtyp bolyp qalyp edi. Endigi daý jaıpaq tabaqqa shúpildeı tolǵan aqshany kimniń alatyndyǵy týraly daýǵa jalǵasty.
– Jastarǵa berý kerek! – dedi bir bilgish, – úılený toılaryna syılyq.
– Ánshi alý kerek, – dedi ekinshisi, – atam zamannan solaı. Burynǵylar at mingizip, atan jetektetken. Eńbegi bar emes pe?!
Toıdyń shyrqy bastalmaı jatyp buzyldy. Shynynda da qalaı edi ózi, qap! Bet ashamyz dep júrip...