Turǵyn úı qurylys jınaq banki («Báıterek» UBH» AQ-nyń enshiles uıymy) klıentteriniń depozıtterine 2019 jyly 38 mlrd teńge tústi. Turǵyn úı qurylys jınaq bankiniń 1,2 mln salymshysy memleket syıaqysyn aldy, dep habarlady atalmysh banktiń baspasóz qyzmeti.
Turǵyn úı qurylys jınaq bankiniń 274 myńnan astam klıenti 101 000 teńgeni quraıtyn eń joǵary memleket syıaqysyna ıe boldy. 2019 jyly olar óz shottarynda 505 000 teńge, ıaǵnı 200 AEK-ke teń qarajat jınady. Al 200 aılyq eseptik kórsetkishten joǵary aqsha jınaǵan salymshylar syıaqy berilmegen jınaq bóligi boıynsha memlekettik syıaqyny 2020 jyldyń qorytyndysy nátıjesinde alady.
– Turǵyn úı qurylys jınaq júıesine degen senim elimizde jyl sanap artyp keledi. Soǵan baılanysty Turǵyn úı qurylys jınaq banki salymshylarynyń sany da ulǵaıyp keledi. 2019 jyly bankte 406 954 jańa depozıt ashyldy. Zań boıynsha olarǵa memleket jyl saıyn syıaqy bólip otyrady. Atalǵan bonýs qazaqstandyqtarǵa baspanaǵa tezirek qarajat jınap, qonys toılaryn toılaýǵa kómektesedi. Turǵyn úı qurylys jınaq bankiniń salymdary bank syıaqysyn qosqanda – naryqtaǵy eń tabysty depozıt. Jyldyq tıimdi syıaqy mólsherlemesiniń kólemi 14%-ǵa deıin jetedi, – deıdi Turǵyn úı qurylys jınaq bankiniń basqarma tóraıymy Lázzat Ibragımova.
2019 jyldyń qorytyndysy boıynsha memleket 1,2 mln qazaqstandyq azamattyń salymdaryn arttyrýǵa kómektesti. Salystyrmaly túrde qarastyrsaq, 2018 jyly Turǵyn úı qurylys jınaq bankiniń 1 036 841 salymshysy, al 2017 jyly 896 620 klıenti memleket syıaqysyn alǵan bolatyn.
Aǵymdaǵy jyly eń joǵary memleket syıaqysynyń mólsheri 106 040 teńgeni quraıdy. Ony alý úshin banktegi shotyńyzdy bir jyl ishinde kem degende 530 200 teńgege (200 AEK) toltyrý kerek. Orta eseppen salymshylar depozıtterine aı saıyn 44 000 teńgeden salyp otyrǵandary abzal.
Almaty