Spıdveı – sporttyń eń kúrdeli de qaýipti jáne shytyrman oqıǵaly túriniń biri. Ekiniń biriniń júregi daýalaı bermeıtin muzdaǵy motojarys qaı kezde de dramaǵa toly. Sonymen, FIM Halyqaralyq Motosıkl federasııasynyń qoldaýymen «Medeý» muz aıdyny muzdaǵy motojarystan 2020 jylǵy álem chempıonatynyń alǵashqy fınaly márege jetti.
Almaty kezeńiniń eki kúninde de kóshbasshylyq róldi bermegen reseılik Danıl Ivanov aınalyp kelgende aqtyq fınalda jeńimpaz atandy. Ekinshi oryndy Dmıtrıı Homısevıch ıelense, úzdik úshtikti Dmıtrıı Koltakov túıindedi. Osylaısha, bıyl da reseılik sportshylar «Medeý» muz aıdynynda júldeli úzdik úshtikti qurady.
«Biz Qazaqstan úshin altynshy, sondaı-aq, besinshi mereıtoılyq fınaldyń aty ańyzǵa aınalǵan «Medeý» muz aıdynynda ótkenine qýanyshtymyz. FIM trektik komıssııasynyń joǵary talaptaryna saı jınaqtalǵan tájirıbe men qajetti ınfraqurylym jáne «Samuryq-Qazyna» ulttyq ál-aýqat qorynyń áriptestik tanytýy, Mádenıet jáne sport mınıstrligi men Almaty qalasy ákimdiginiń qoldaýy bizge FIM-men yntymaqtastyqty nyǵaıtyp, spıdveıden álem chempıonatynyń fınaldaryn ótkizý quqyǵyn ıelenýge múmkindik berdi» dedi Qazaqstan Avtomotosport federasııasynyń prezıdenti Marat Ábiqaev.
Almatydaǵy álem birinshiliginiń kezeńinde jeti elden 18 «muz gladıatory» baq synady. Olardyń ishinde Germanııadan bir, Nıderlandtan bir, Chehııadan bir, Aýstrııadan úsh, Qazaqstannan úsh jáne Shvesııadan tórt, Reseıden bes sportshy muzdy jolǵa shyqty.
Muzdaǵy motobáıgeniń ekinshi kúni qysqy spıdveı sheberleri arasyndaǵy naǵyz taıtalaspen este qaldy. «Muz gladıatorlary» árbir burylysta sopaq pishindi trekte básekelesip, ár upaı úshin taıtalasty. Jeksenbide kún jyly boldy. Bul jarysqa da, jankúıerlerdiń kóńil kúıine de oń áser etti.
Aldyn ala kútkendeı, jeke eseptegi birinshiliktiń basty favorıti – reseılik motojarysshylar fınaldyq kezdesýlerdiń qorytyndysy boıynsha júldeli oryndarǵa jaıǵasty. Alaıda Aýstrııadan, Shvesııadan, Nıderlandtan jáne Germanııadan kelgen sańlaqtar reseılikterge des bermeı, muzdy jolda baryn saldy. Ásirese, nemis Iohan Veber men shvesııalyq Martın Haarahıltýnen jáne dodadaǵy áke men ul sanalatyn Nıklas pen Stefan Svenssondardy aıryqsha atap ótýge bolady.
«Medeýdegi» motojarysqa jan bitirip, dramatızm syılaǵan nemis motoshabandozy Iohan Veberdiń kezekti bir aınalymnyń burylysynda motosıklinen qulaýy kórermenderdiń nazaryn aýdardy. Aýstrııalyq Frans Sornǵa soqtyǵysqan shabandoz jedel járdem arbasymen alańnan áketildi. Nemis gladıatorynyń batyldyǵyna kórermender ornynan turyp qol soqty. Bul oqıǵa osy sport túrine tán sátterdiń biri, nemis shabandozy Almatydaǵy emhanalardyń birine jatqyzyldy.
Jıyrmasynshy kezeńde birden eki oqıǵa boldy. Aldymen burylysta motosıkldi ıgere almaı, shved Ove Ledshtrem muzǵa qulady. Osy aınalymda nıderlandtyq Djasper Ivemanyń da joly bolmady, ol muz trassasynyń burylysynda motosıklmen birge salto jasap, joldyń jıegindegi saban qorshaýǵa soqtyǵysyp qana toqtaı aldy. Qýanyshqa oraı, eki oqıǵadan eshkim aýyr jaraqat alǵan joq. Djasper tipti qorytyndy baspasóz-konferensııasyna qatysyp, óziniń ádemi qulaýyna qatysty ázildedi.
Qazaqstandyq shabandozdar Vladımır Cheblokov, Pavel Nekrasov jáne Sergeı Serov spıdveıden jeke álem chempıonaty fınalynyń qorytyndy kúniniń nátıjesinde fınalda óte almady. Qazaqstandyqtarǵa álemdik spıdveıdiń sheberlerimen ıyq teńestire kúsh synasý ázirge ońaıǵa soqpaýda.
Ekinshi jarys kúniniń fınalyna tórt reseılik sportshy dara shyqty, olar – Danııl Ivanov, Dmıtrıı Koltakov, Igor Kononov jáne Dmıtrıı Homısevıch. Qajyrly kúreste máre syzyǵyn birinshi bolyp qazirgi álem chempıony, birinshi jarys kúniniń jeńimpazy Danııl Ivanov kesip ótti.
Álem birinshiliginiń Almatydaǵy kezeńine jańa serpin ákelgen aýstrııalyq motojarysshy Harald Sımon boldy. Birinshi saıys kúni úzdik úshtikti túıindegen onyń kózine jas alǵanyn aıta ketken abzal. Bul onyń 1992 jyldan beri álem birinshilikterindegi alǵashqy jeńis tuǵyry edi.
Halyqaralyq Motosıkl federasııasy (FIM) trek komıssııasynyń dırektory Armando Kastanıa spıdveıden jeke eseptegi álem chempıonaty fınaly joǵary deńgeıde uıymdastyrylǵanyn atap ótti.
– Halyqaralyq Motosıkl federasııasynyń ókilderi, sondaı-aq, barlyq motoshabandozdar Qazaqstandaǵy dodada baǵyn synaýǵa árdaıym asyq. Sebebi munda barlyǵy tııanaqty uıymdastyrylǵan, qonaqjaılyqty atap ótkenim de oryndy. Biz aldaǵy ýaqytta Qazaqstannyń Avtomotosport federasııasymen yntymaqtastyqty jalǵastyrýǵa úmittenemiz, – dedi Armando Kastanıa.
Qorytyndy baspasóz máslıhatynda Avtomotosport federasııasynyń prezıdenti Marat Ábiqaev bul jarystyń Qazaqstanda jalǵasatynyna senim bildirip: «Biz kelesi jyly elimizde spıdveıden Jeke eseptegi álem chempıonatynyń kezekti fınalyn ótkizý týraly kelisimge qol jetkizdik. Qazirgi tańda biz ony ótkizýge arnalǵan úsh alańdy qarastyrýdamyz, bul – «Medeý» muz aıdyny men Almatydaǵy «Sokol» trassasy, sondaı-aq, elordamyz Nur-Sultan qalasynda jarysty ótkizý jospary da bar», - dedi.
ALMATY