Germanııanyń Dıýsseldorf qalasynda ótken Grand Slam týrnıri óz máresine jetti. Bul jarystan Qazaqstannyń dzıýdoshylary qur qol qaıtty.
Biz buǵan deıin jarystyń alǵashqy eki kúninde jerlesterimizdiń tegisteı utylǵany jaıynda jazǵan edik. Sońǵy kúni taǵy bes salmaq dárejesi boıynsha túrli-tústi júldeler sarapqa salyndy. Bul saıysta da bizdiń balýandardyń joly bolmady.
90 kılo salmaqta beldesken Islam Bozbaev alǵashqy aınalymda aýstrııalyq Marko Babandjadan basym túskenimen, kelesi kezeńde ózbekstandyq Davlat Bobonovqa jol berdi. Ersultan Muzafarov tusaýkeser kezdesýinde mysyrlyq Ábd El Akherge utyldy.
100 kılo salmaqtaǵy Vıktor Demıanenko men Aıbek Serikbaev ta alǵashqy aınalymnan asa almady. Vıktor majarstandyq Vıktor Kerjennıkke, al Aıbek grýzııalyq Georgıı Shıkovanıge ese jiberdi.
Áıelder saıysynda 78 kılo salmaqtaǵy Zarına Raıfova bastapqyda portýgalııalyq qarsylasyn utqanymen, ile-shala slovenııalyq sportshyǵa jol berdi. Al asa aýyr salmaqtaǵy Kamıla Berliqash Ońtústik Koreıanyń ókili Kım Haıýnnyń osal tusyn taba almady.