Byltyr «Stop-oıyn» jedel aldyn alý sharasynyń nátıjesinde bas shaharda 135 qumar oıyn orny anyqtalyp, 100-den astam oıyn apparaty joıyldy. Bul týraly Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda Nur-Sultan qalasy boıynsha Ekonomıkalyq tergeý departamentiniń tergeý basqarmalarynyń basshylary Oljas Súleımenov pen Bolat Hamıtov aıtty.
Vedomstvo ókilderi jyl basynan beri 10-nan astam oıyn apparaty, termınaldar jáne basqa da qumar oıyn quraldary tárkilengenin jetkizdi. Nur-Sultan qalasy boıynsha Ekonomıkalyq tergeý departamentiniń 2-shi tergeý basqarmasynyń basshysy Oljas Súleımenovtiń aıtýynsha, 2019 jyly elordada aqshany zańsyz qolma-qolǵa aınaldyrý faktisine qatysty 4 qylmystyq toptyń áreketi áshkerelendi. Zańsyz aınalymnan 30 uıymnyń móri tárkilenip, memleketke kelgen shyǵyn mólsheri 2 mlrd teńgeni qurady. Qylmystyq toptardyń isine baılanysty tıisti aıǵaqtar alyndy.
– 2019 jyly astanada Ekonomıkalyq tergeý departamentiniń óndirisinde 200-ge jýyq qylmystyq is tirkelip, onyń 108-i sotqa jiberildi. Jumys barysynda memleket bıýdjetine 2,5 mlrd teńge qaıtaryldy. Aldyn alý jumystary aıasynda Ulttyq bank jáne ekinshi deńgeıli bankterdiń basshylary, sondaı-aq qaýipsizdik qyzmet ókilderiniń qatysýymen túsindirý jumystary uıymdastyryldy. Nátıjesinde ózara is-qımyl jóninde, sol sekildi qylmystyq jolmen tabylǵan kiristi zańsyz qolma-qol aqshaǵa aınaldyrýǵa jáne kapıtaldy shetelge shyǵarýǵa qarsy birlesken jumystarǵa baılanysty usynystar ázirlendi, – dedi O.Súleımenov.
Ekonomıkalyq tergeý departamentiniń ókilderi bas qalada jalǵan valıýtany shyǵarýdy jolǵa qoıǵan azamat qolǵa túskenin aıtty. Anyqtalǵandaı, ustalǵan adam qaǵaz aqshany úıinde basyp júrgen. Jalǵan kýpıýralar ulttyq valıýtadan kóshirilip shyǵarylypty. Ony elordada ótkizýdiń 34 deregi anyqtaldy. Kináli azamattyń qylmysyn dáleldeıtin barlyq aıǵaq jınalǵan dedi quzyrly organ basshysy. Qazir bul faktige qatysty qujattar sotqa jiberildi. Osy rette tergeýshiler Ulttyq bankke qaýipsizdik jumystaryn meılinshe kúsheıtýge keńes berdi.
Budan bólek spıkerler Arys jáne Otardaǵy áskerı qoımalarda oq-dárini joıýǵa baılanysty 1,7 mlrd teńge urlanǵanyn jetkizdi. Nur-Sultan qalasy boıynsha Ekonomıkalyq tergeý departamentiniń 1-shi tergeý basqarmasynyń basshysy Bolat Hamıtov Indýstrııa jáne ınfraqurylymdyq damý mınıstrligi «Qaztehnologııa» AQ basshylyǵy Arys jáne Otar qalalaryndaǵy áskerı bólimderde oq-dárilerdi joıý kezinde metall qaldyqtaryn satý nátıjesinde 1,7 mlrd teńgeni urlaǵany anyqtaldy. Dese de basqarma ókilderi atalǵan kásiporyn basshysyna qatysty qylmystyq is endi qozǵalǵandyqtan, tergeý málimetterin ázirge jarııalaý múmkin emes deıdi.