Bul týraly Eńbek jáne halyqty áleýmettik qorǵaý mınıstri Birjan Nurymbetov Ortalyq kommýnıkasııalar qyzmetiniń alańynda aıtty.
«Jumys istep júrgen azamattar ózderiniń eńbek quqyqtaryn bilýi qajet.
Birinshiden, búgingi tańda barlyq kásiporyndar, mekemeler eger de qashyqtan jumys isteýge múmkindigi bolsa, qashyqtan jumys isteý rejımine kóshýge mindetti. Bul eńbek kodeksiniń 138-babymen retteledi, qashyqtan jumysqa kóshken kezde jumystyń tóleý tártibi ózgermeıdi. Bul jerde azamat óziniń jumys ornynda emes, úıden jumysty atqarýyna múmkindigi bolady. Eńbek kodeksi boıynsha oǵan jumys berýshi tıisti jaǵdaı jasaýyna mindetti jáne jalaqysy atqarylǵan jumys boıynsha óziniń aı saıynǵy alyp júrgen kóleminde tólenetin bolady.
Ekinshiden, eger de jumys kólemi shekteletin bolsa, jumys berýshiler ózderiniń buıryǵymen jumys rejımin, qysqartylǵan jumys rejımine kóshýine quqyly. Bul degenimiz aptasynda jumys kúnderiniń sany azaıý múmkin nemese sol bir kúndegi atqarylatyn jumys saǵaty azaıýy múmkin» dedi ol.