Búgin tamyzdyń 22-si kúni Astana ýaqytymen 19:00 saǵatta Aqtóbeniń «Aqtóbe» komandasy óz alańynda Eýropa lıgasynyń toptyq kezeńine shyǵý úshin bolatyn birinshi matchta Ýkraına astanasy – Kıev qalasynyń «Dınamo» klýbyn qabyldaıdy.
Osy kezdesýge qatysý úshin kıevtikter Aqtóbege keshe ushyp keldi. Komandamen birge taǵy 57 jýrnalıst, 70 jankúıer birge jetti. Jalpy, Ýkraına delegasııasy quramyn 150 adam quraıdy. Ýkraına basylymdarynyń ókilderi kelgen boıda Aqtóbe qalasymen tanysyp úlgerdi. «Jazýshy aǵaıyndar áýejaıdan meımanhanaǵa deıin baratyn jolda, avtobýstyń ishinde, bul qalany ózderi buryn bolǵan shaharlarmen salystyryp otyrdy. Nátıjesinde olar onyń Tıraspol, Sýmy jáne Donesk qalalaryna uqsaıtynyn baıqady», - dep jazdy osyǵan oraı Sport.ua.
Keshe keshke «Dınamo» fýtbolshylary Aqtóbeniń Qajymuqan atyndaǵy ortalyq stadıonyna kelip, birinshi jattyǵýyn ótkizdi. Jattyǵýdan keıin komandanyń ókili Sergeı Rebrov mundaǵy shalǵynnyń tym bıik ekenin aıtyp shaǵynypty. Al bas jattyqtyrýshy Oleg Blohın Eýropa lıgasynyń 4-irikteý raýndynyń birinshi oıyny ózderi úshin kerekti nátıjeni beretinine senimdi.
Ýkraınanyń birqatar buqaralyq aqparat quraldary komandalardyń alańǵa shyǵatyn starttyq quramdary týraly boljam jarııalapty.
Olar mynadaı:
«Aqtóbe»: Sıdelnıkov, Arzýmanıan, Mýldarov, Prımýs, Badlo, Kovalchýk, Kapadze, Harabara, Geınrıh, Haırýllın, Davydov.
«Dınamo»: Koval, Gýsev, Dragovıch, Vıda, Tremýlınas, Velozý, Bezýs, Arýna, Iаrmolenko, Lens, Mbokanı.
Damır Qojamqul.
PS. Match búgin Astana ýaqytymen 19-00 saǵatta KazSport telearnasynan tikeleı efır arqyly kórsetiledi.
Biz aqtóbelikterge "Shahterdiń" tabysyn qaıtalýdy tileımiz.
