Qazaqstan azamattarynyń densaýlyǵynyń qaýipsizdigin qamtamasyz etý maqsatynda qazirgi tańǵa deıin Qyrǵyzstan Respýblıkasynda bolǵan qazaqstandyqtar óz otandaryna evakýasııalandy. Bul týraly Qorǵanys mınıstrliginiń baspasóz qyzmeti habarlady.
Bul evakýasııa koronavırýstyń taralýyna baılanysty Qazaqstan Prezıdenti Qasym-Jomart Toqaevtyń tapsyrmalaryna sáıkes júrgizildi.
Qazaqstan Áskerı-áýe kúshteri, áskerı kólik avıasııasynyń kúshimen 21 azamat, onyń ishinde 10 bala elge oraldy. Evakýasııalanǵandar Qyrǵyzstanda emdelýlerine baılanysty bolǵandyqtan kele almaǵan.
Aıta ketý kerek, evakýasııalanǵandar arasynda koronavırýs ınfeksııasyn juqtyrǵandar joq. Densaýlyq jaǵdaılary jaqsy, shaǵymdary bolmaǵan. Barlyq kelgen adamdar tıisti medısınalyq tekseristen ótip, ınfeksııalyq baqylaý talaptaryna sáıkes karantınge jiberiledi.
Evakýasııalanǵan azamattardyń týystary men jaqyndaryna kelgendigi týraly habarlanyp, olar karantın kezeńiniń erejelerimen tanysady.
Budan bólek, Atyraý qalasynyń áýejaıyna kelgennen keıin áskerı ushaqqa sanıtarlyq óńdeý júrgizildi.