Jambyl oblysynyń óńirlik kásipkerler palatasy janyndaǵy Isker áıelder keńesi indettiń aldyn alýda aıanbaı eńbek etip júrgen dárigerlerdi qoldaý maqsatynda «Jaqsylyq aksııasyn» uıymdastyrdy. О́ńirdegi isker áıelder keńesi oblystyq meıramhanalar men qonaqúıler jáne «Sheberler mekeni» jeńil ónerkásip kásiporyndary assosıasııalarymen birigip jambyldyqtarǵa barynsha kómek kórsetýde.
Máselen, eriktiler ózderi medısınalyq maskalar tigip, olardy kópbalaly otbasylardyń músheleri men zeınetkerlerge taratsa, muqtaj uıymdarǵa sanıtarlyq-gıgıenalyq quraldardy tegin jetkizip berýde. Al, balalar úıine azyq-túlik jetkizilip, jýýǵa qajetti quraldar jáne balalarǵa arnalǵan pamperster de taratyldy. Sonymen qatar, atalǵan aksııanyń uıymdastyrýshylary óńirdegi dárigerlerge dámdi palaý usyndy.
«Osyndaı qıyn ýaqytta biz barlyǵymyz bolashaq úshin, jaqyndarymyzdyń densaýlyǵy úshin bir-birimizge qol ushyn bere bileıik. Ásirese, dárigerlerge qoldaý bildirý asa mańyzdy. Olarǵa búginde búkil el senim artyp otyr. Biz olardy maqtan tutatynymyzdy, árqashanda qoldaıtynymyzdy kórsetýimiz kerek», deıdi oblystyq kásipkerler palatasy isker áıelder keńesiniń tóraıymy Aıgúl Aqshalova. Uıymdastyrýshylar áýeli «Ana men bala» oblystyq ońaltý ortalyǵynda bolyp, odan keıin oblystyq jedel járdem medısınalyq stansııasyna bardy. Dárigerler belsendilerge izgi nıetteri men syı-sııapattary úshin alǵys bildirdi. Sondaı-aq, barsha jambyldyqtardy koronavırýstyq ınfeksııadan ózin jáne jaqyndaryn qorǵaý úshin qaýipsizdik sharalaryn barynsha saqtaýǵa shaqyrdy. «Biz sizder úshin jumys isteımiz, sizder biz úshin úıde qalyńyzdar. Barlyq jerlesterimizden asa qajet bolmasa úıden shyqpaýlaryn suranamyz. Qoldy jıi jýyp jáne antıseptıkti turaqty paıdalanyńyzdar. Jaǵdaı kúrdeli, degenmen dárigerlerdiń nusqaýlyqtaryn jiti oryndasańyzdar, deńderińiz saý bolady», dedi oblystyq jedel járdem medısınalyq stansııasynyń dıspetcheri Natalııa Týrdymatova. Budan keıin aksııa uıymdastyrýshylary Baızaq aýdany Myrzataı aýylyndaǵy oblystyq týberkýlezge qarsy dıspanserine baryp, onda stasıonarda karantınde jatqan azamattardyń jaǵdaıymen tanysty. Mundaǵy dárigerler emdelýshilerdiń jaǵdaıynyń jiti baqylaýda ekenin aıtty. Osyndaı aksııalar oblystyń Qordaı, Jýaly jáne Moıynqum aýdandarynda da ótýde. Aýdandardaǵy sanıtarlyq-baqylaý beketterinde ondaǵan medıkter men polıseıler táýlik boıy qyzmet atqarýda.
Jambyl oblysy