Qurlyqtyq hokkeı lıgasynda (QHL) synǵa túsken elordanyń «Barys» komandasy bıyl táýir nátıje kórsetti dep aıta alamyz. Sebebi turaqty birinshilikte tórtinshi orynǵa turaqtasa, Chernysheva dıvızıonynda top jardy. Sonymen qatar Gagarın kýbogynyń pleı-off kezeńin de joldama alǵan bolatyn.
Jerlesterimiz Gagarın kýbogynyń pleı-off kezeńinde alǵash Magnıtogorskiniń «Metallýrg» komandasymen kezdesip, bes oıynǵa sozylǵan matchta jeńiske jetti. Ekinshi pleı-off kezeńinde «Barys» Novosibirdiń «Sıbır» klýbymen sheberlik baıqasýy kerek bolǵan. Alaıda Prezıdent Qasym-Jomart Toqaevtyń koronavırýs indetinen saqtaný maqsatynda el aýmaǵynda tótenshe jaǵdaı jarııalaýyna baılanysty «Barys» Gagarın kýbogyn jalǵastyrýdan bas tartty.
«Barystyń» osyndaı aıtýly jetistigine óz úlesin qosqan komandanyń úzdik surmergeni Korben Naıt jýyrda klýbtan ketýi múmkin. Bul týraly otandyq birqatar BAQ jarysa jazýda. О́ıtkeni osy jyldyń 30 sáýirinde kanadalyq shabýylshynyń «Baryspen» kelisimshart merzimi aıaqtalady. Qazirgi tańda Korben Naıtqa Ombynyń «Avangard» klýby kóz tigip otyr.
Al klýbtyń prezıdenti Borıs Ivanıshev barlyq oıynshylar koronavırýsqa baılanysty óz elderine ketkenin, jaǵdaı turaqtalǵan soń kelisimsharty aıaqtalǵan hokkeıshilermen jeke-jeke sóılesetinin aıtqan edi.
Kanadalyq shabýylshy QHL-dyń bıylǵy maýsymynda 60 match ótkizip, 41 (20+21) upaı jınaǵan. Sondaı-aq ol pleı-off kezeńdegi 5 oıynda bir ret nátıjeli pas asyrǵan.