Májilis depýtaty Erbolat Saýryqov «Aýyl» partııasy atynan jańa Konstıtýsııa jobasyna qatysty baıandama jasady. Depýtattyń aıtýynsha, partııa ókilderi BAQ pen qoǵamdyq alańdarda túsindirý jumystaryn belsendi túrde júrgizip jatqanyna qaramastan, partııa ishinde jańa Konstıtýsııa jobasyn qosymsha talqylaýdy qajet dep sanaǵan, dep jazady Egemen.kz.
Osyǵan baılanysty 2 aqpanda fraksııa otyrysynda, al keshe barlyq óńirlik fılıaldar men partııa aktıviniń qatysýymen ótken partııanyń Saıası keńesiniń keńeıtilgen otyrysynda Konstıtýsııa jobasy egjeı-tegjeıli qaralyp, jan-jaqty talqylanǵan. Keńesterdiń qorytyndysy boıynsha «Aýyl» partııasy jańa Konstıtýsııa jobasyna tolyq ári biraýyzdan qoldaý bildirdi.
Maqsat Tolyqbaı: Jańa Ata zańnyń qazaq tilindegi nusqasy tolyqtaı qaıta jazyldy
Depýtat baıandamasynda qoǵamda taralyp jatqan jalǵan aqparatqa naqty toqtaldy. Birinshi másele – jerdi sheteldikterge satý týraly qaýeset.
«Áleýmettik jelilerde jańa Konstıtýsııa jobasynan bul tyıym bildirtpeı alyp tastaldy degen pikirler keńinen taralyp otyr. Bul aqparattyń jalǵan ári shyndyqqa saı kelmeıtinin búkil jaýapkershiligimmen atap ótkim keledi», dedi ol.
Jerge, jer qoınaýyna, sýǵa, ósimdikter men janýarlar dúnıesine qatysty negizgi tujyrymdar ózgerissiz qalǵan. Konstıtýsııalyq reforma sheńberinde memlekettiń irgeli qaǵıdattary álsiregen joq, kerisinshe nyǵaıtyldy. Jańa Konstıtýsııa jobasy Qazaqstannyń búkil aýmaǵy bólinbeıtin, qolsuǵylmaıtyn jáne memleket qorǵaýyndaǵy birtutas keńistik ekenin naqtylaıdy.
Ekinshi másele – adamı kapıtaldy memlekettiń strategııalyq tańdaýy retinde damytý.
«Ata Zańda Qazaqstan Respýblıkasy adamı kapıtaldy, bilim berýdi, ǵylym men ınnovasııalardy damytýdy memleket qyzmetiniń strategııalyq baǵyty retinde moıyndaıtyny anyq jazylǵan.
Sondaı-aq, memlekettiń adamdarǵa júıeli ári dáıekti túrde ınvestısııalar salý, bilim men ǵylymı salany damytý, sol arqyly ulttyń adamı áleýetiniń sapasyn kóterý jónindegi uzaq merzimdi nıetin kórsetedi.
Bul jańa Konstıtýsııanyń basqa da erejelerinde basa kórinis tabatynyn atap ótý mańyzdy.
Ata Zań zııatkerlik menshik quqyqtaryn qorǵaýdy kúsheıtedi, munyń ózi úzdik halyqaralyq quqyq qoldaný praktıkalaryna sáıkes kelip, ınnovasııalyq damý úshin qolaıly quqyqtyq orta jasaıdy», dedi depýtat.
Depýtattyń aıtýynsha, tehnologııalyq damý ekonomıkany, eńbek naryǵyn, áleýmettik prosesterdi kún saıyn ózgertip jatqan qarqyndy álemde basty resýrs endi tabıǵı qazbalar emes, adamdar, olardyń bilimi, quzyreti men zııatkerlik áleýeti bolyp otyr. «Bilim ekonomıkasy» barlyq basty ózgeristerdiń negizi ári qozǵaýshy kúshi bolyp tabylady. Konstıtýsııalyq deńgeıde adamı kapıtaldy damytý baǵytyn bekitý Qazaqstanǵa álemdik damýdyń aldyńǵy shebine shyǵýǵa jáne damyǵan memleketter arasynda laıyqty oryn alýǵa naqty múmkindik beredi.
Erkin Ábil: Tarıhı sabaqtastyqty Konstıtýsııada bekitý – ult jadyn qorǵaý
Úshinshi mańyzdy jańalyq – arnaýly quqyqtyq rejımder men «qarqyndy damıtyn qala».
«Jańa Konstıtýsııa jobasynda «Qazaqstan Respýblıkasynyń jekelegen óńirlerin qarqyndy ekonomıkalyq damytý maqsatynda «qarqyndy damıtyn qala» arnaýly quqyqtyq rejımin belgileý múmkindigi bekitiledi», dedi E.Saýryqov.
Bul rejımde memlekettik basqarý men sot júıesiniń jumys erekshelikteri qarastyrylýy múmkin, biraq ol konstıtýsııalyq zańdar sheńberinde qatań júzege asyrylady. Álemdik tájirıbe (Qytaı, BAÁ, Úndistan, Vetnam) osyndaı tetikterdiń joǵary tıimdiligin kórsetedi. Norma el aýmaǵynyń ýnıtarlyǵyn, tutastyǵyn buzbaı, ekonomıkalyq ıkemdilik pen ınvestısııalyq tartymdylyqty qamtamasyz etedi.
Sóz sońynda Erbolat Saýryqov jańa Konstıtýsııa jobasynyń qoǵam suranysy men memlekettiń strategııalyq múddelerine saı ekenin atap ótti.
«Bizdiń fraksııa jańa Konstıtýsııa jobasyn tolyǵymen qoldap, eldiń turaqty damýy, memlekettilikti nyǵaıtý jáne bolashaq urpaqtyń ál-aýqaty úshin áriptesterimizdi ony qoldaýǵa shaqyrady», dedi depýtat.
Jańa Konstıtýsııa jobasynda azamattardyń quqyǵyn sıfrlyq ortada qorǵaý normasy bekitildi