Tájikstannan 26 qazaqstandyq elge oraldy. Qazaqstan azamattary bar ushaq Almaty áýejaıyna sátti qondy, delingen QR Qorǵanys mınıstrliginen joldanǵan aqparatta. Osy joly áskerıler S-295 áskerı-kólik ushaǵymen Shymkent qalasynan Tájikstanǵa sol eldiń 20 azamatyn jetkizdi.
El Prezıdentiniń nusqaýyna sáıkes elimizdiń Qorǵanys jáne Syrtqy ister mınıstrligi, sondaı-aq Tájikstannyń memlekettik organdarynyń birlesken kúsh-jigeriniń nátıjesinde otandastarymyz elge oraldy. Qaýipsizdik maqsatynda olarmen birge áskerı dárigerlerdiń medısınalyq toby birge ushyp keldi. Elge oralǵan qazaqstandyqtardyń arasynda koronavırýsty juqtyrǵandar joq. Barlyq jolaýshylardyń densaýlyqtary qalypty. Degenmen, talapqa sáıkes elge oralǵandar medısınalyq tekserýden ótip, ınfeksııalyq baqylaý talaptaryn saqtaı otyryp, karantınge ornalastyrylady.
Buǵan deıin Qazaqstan ÁÁK áskerı-kólik avıasııasy mamandary Saýd Arabııasynan 33, Kýveıtten 2, Qyrǵyzstannan 21 qazaqstandyqty evakýasııalaǵan bolatyn.
Otanyna oralǵan qazaqstandyqtar Qazaqstan Úkimeti men Qorǵanys mınıstrligine alǵysy sheksiz ekendigin bildirdi.
ALMATY